DUHA NGA MEMBRO han Komite Sentral han Communist Party of India (Maoist) an masobra 10 kaadlaw nga sikreto nga igindetiner antes tuyo nga ginpatay han armado nga pwersa han rehimen Modi hadton Septyembre 22. Ginpapagawas han rehimen Modi nga napatay ha engkwentro an duha ha Abujhmad agud tahuban an krimen ngan likyan an baratunon hini.

Sigon ha mga report, nadakop han armado nga pwersa han India hira Kasamang Katta Ramachandra Reddy (Raju Dada) ngan Kasamang Kadari Satyanarayana Reddy (Kosa Dada), ngaduha diri armado, ha Raipur City ha estado han Chhattisgarh hadton Septyembre 10. Gindududahan nga gindara hira ha usa nga sikreto nga lugar giutan han Septyembre 11 tubtub Septyembre 20 diin posible iginpailarum hira ha grabe nga torytur antes patayon. “Buwa an engkwentro. Kinahanglan ini suknaon han ngatanan,” sigon kan Vikalp, tinaglawas han Dandakaranya Special Zonal Committee.

Labot ha duha, nahilista liwat an tuyo nga pagpatay ha lima pa nga mga lider ngan membro han Komite Sentral ngan Eastern Regional Bureau han CPI (Maoist) ha naglabay nga bulan. Ngatanan hira ginpapagawas liwat nga mga napatay ha mga engkwentro. Ginpasidunggan han partido an ngatanan nga mga martir ngan naghalad han kinabuhi atubangan han madarahug nga Operation Kagar han rehimen Modi.