Magluwas sa hublag sang mga pamatan-on kag estudyante, nagapadayon man ang protesta kontra korapsyon sang mga mamumugon, imol nga taga-syudad, mangunguma, mangingisda, tawong simbahan kag iban pa nga sektor. Suno sa ila, magapadayon ang mga protesta tubtob wala sang mapasabat nga mga korap sa ila krimen sa pumuluyo.

Sadtong Oktobre 7, naglab-ot sa 17,000 ang nagtambong kag nakig-isa sa martsa kag misa sang banwa sa Baguio City. Pagkaligad sang duha ka adlaw, ululupod nga nag-martsa ang mga residente sang San Jose Del Monte City sa Bulacan.

Sadtong Oktobre 11, masobra sa 3,000 ang nagtambong sa pangamuyo kontra korapsyon sa Bacolod City. Sa adlaw man nga ini, linibo ka tumuluo kag tawong simbahan ang nagpakigbahin sa isa ka lakat para sa hustisya batuk sa korapsyon sa Sampaloc sa Manila. Ginlunsar man sa Albay ang isa ka martsa.

Sadtong Oktobre 12, naglunsar sang lakat kontra korapsyon sa Santiago City, Isabela kon diin masobra sa 500 ang nag-upod sa aktibidad. Sa adlaw man nga ini, isa ka rali ang liwat ginlunsar sa Meycauayan, Bulacan. Pagkaligad sang duha ka adlaw, naglunsar sang fluvial parade sa Manila Bay ang mga mangingisda sang Cavite.

Sadtong Oktobre 17, nagkasa sang protesta ang mga unyon sang mamumugon sa idalum sang Kilusang Mayo Uno sa Laguna. Isa ka rali man ang ginpatigayon sang mga progresibong grupo sa Cebu sa adlaw man nga ini. Pagkaligad sang isa ka adlaw, ginlunsar ang isa ka protesta sa La Trinidad Public Market sa Benguet.

Sadtong Oktobre 19, linibo ang nagpakigbahin sa martsa kag pangamuyo batuk sa mapangwasak nga dredging, korapsyon kag dinastiya sa pulitika sa Vigan City, Ilocos Sur. Pagkaligad sang isa ka adlaw, ginlunsar sang mga nanay kag kababaehan ang isa ka zumba kontra korapsyon sa Quezon City.

Nagapadayon man ang Black Friday Protest sang mga progresibong grupo. Ginlunsar man sini lang sang simbahan ang bersyon sang hublag kada Byernes.

Gin-anunsyo man sini nga bulan sang United People Against Corruption ang plano nga magpasaka sang isa ka indemnity class suit batuk sa mga kongresista, kontratista kag opisyal sang gobyerno nga imbolbado sa maanomaliya nga mga proyektong flood control.

Sa Hong Kong kag Canada, gintukod man sang mga grupong Pilipino sining Oktobre ang mga alyansa nga nagapamatuk sa korapsyon sa Pilipinas..