Malaksid iti tignay dagiti kabataan ken estudyante, agtultuloy met ti protesta a kontra korapsyon dagiti mangmangged, nakurapay iti syudad, mannalon, mangngalap, tao’t simbaan ken dadduma pay a sektor. Kunada, agtuloy-tuloy dagiti protesta agingga nga awan ti mapagsungbat a korap iti krimen da iti umili.

Idi Oktubre 7, dumanon iti 17,000 ti dimmar-ay ken nakikaykaysa iti martsa ken misa ti umili idiay Baguio City. Kalpasan ti dua nga aldaw, agkakadwa a nagmartsa dagiti residente ti San Jose Del Monte City idiay Bulacan.

Idi Oktubre 11, nasurok 3,000 ti dimmar-ay iti kararag kontra korapsyon idiay Bacolod City. Didiay met laeng nga aldaw, rinibo a parokyano ken tao’t simbaan ti nakipaset iti maysa a pagna para iti hustisya laban iti korapsyon idiay Sampaloc, Manila. Naisayangkat met idiay Albay ti maysa a martsa.

Idi Oktubre 12,naisayangkat ti pagna kontra korapsyon idiay Santiago City, Isabela nu sadinno a nasurok 500 ti nakipaset iti aktibidad. Didiay met laeng nga aldaw, maysa a rali ti balbaliw a naisayangkat idiay Meycauayan, Bulacan. Kalpasan ti dua nga aldaw, nagisayangkat ti fluvial parade iti Manila Bay dagiti mangngalap ti Cavite.

Idi Oktubre 17, nagikasa ti protesta dagiti unyon ti mangmangged iti salinong ti Kilusang Mayo Uno idiay Laguna. Maysa met a rali ti inyaramid dagiti progresibo a grupo iti Cebu didiay nga aldaw. Kalpasan ti maysa nga aldaw, nairuswat met ti maysa a protesta iti La Trinidad Public Market idiay Benguet.

Idi Oktubre 19, rinibo ti nakipaset iti martsa ken kararag laban iti managdadael a dredging, korapsyon ken dinastiya iti pulitika idiay Vigan City, Ilocos Sur. Kalpasan ti maysa nga aldaw, inyaramid dagiti inna ken babbai ti maysa a zumba kontra korapsyon idiay Quezon City.

Agtultuloy met ti Black Friday Protest dagiti progresibo a grupo. Inruswat met ti simbaan itay nabiit ti bersyon ti tignay kada Biyernes.

Inyanunsyo met ti United People Against Corruption daytoy a bulan ti plano nga agipila ti maysa nga indemnity class suit laban kadagiti kongresista, kontratista ken upisyal ti gubyerno a karaman kadagiti naanomalya a proyekto a flood control.

Idiay Hong Kong ken Canada, binukel met dagiti grupo a Pilipino daytoy Oktubre dagiti alyansa a sumupsupyat iti kunniber iti Pilipinas.