Padayon nga ginatay-og sang pangpulitika nga krisis ang reaksyonaryong estado nga ginapadalagan sang burukrata-kapitalista. Wala nagakalma kag pana-panahon nga nagalupok ang kaakig sang masa sa nagakabuyagyag nga mas madamo nga kaso sang korapsyon. Wala nagaka-upos ang kahublagan walkout sang mga estudyante, imbes nagalapta pa sa mga unibersidad sa Manila kag iban pa nga bahin sang pungsod. Nagalapnag ang hublag sang grupong sibiko, tawong simbahan, mamumugon, imol kag iban pa nga sektor.

Mga malagpad nga alyansa sang pumuluyo ang natukod nga desidido nga lab-uton ang hustisya para sa pungsod nga biktima sang kriminal nga korapsyon. Nagbangon na ang isa ka malapad kag gamhanan nga pungsodnon nga kahublagan nga magatay-og sa rehimen US-Marcos kag magatapos sa paghari sang mga burukrata-kapitalista nga hubon nga yara sa poder.

Nagapatinlo-tinlo kag naga-inarte si Marcos nga nakibot ukon akig sa mga kawatan. Wala sang pulos sa pumuluyo ang sekreto nga imbestigasyon sang gintukod niya nga “independent commission” nga klaro nga wala sang iban nga tuyo kundi ang tabunan ang kamatuoran nga binilyon ka piso nga porsyento sa maanomaliya nga kontrata ang ginapasaka sa Malacañang, kag nga mismo si Marcos ang hari kag pinakaputok-putokan sang bukid sang basura sang korapsyon. Tatlo ka bulan pagkatapos niya magdeklarar nga “mahuya naman kamo,” maathag sa mata sang pumuluyo nga si Marcos mismo ang numero uno nga wala sang huya kag pinakagarapalan sa pagbulsa sang binilyon ka piso nga pondo sang pungsod.

Pilit nga ginasakyan sang hubon ni Duterte ang malapad nga protesta sang pumuluyo apang mumho lang gid ang ila matiplang. Indi nila matabunan ang kaugalingon nga krimen kag pagpangawat, ilabi na sadtong nagapungko nga presidente si Rodrigo Duterte. Liwat nga nagakakalkal ang binilyon nga ginbulsa sang mga Duterte sa kontrata sa Pharmally sadtong panahon sang pandemya, ₱51 bilyon flood control project ni Paolo Duterte kag ₱125 milyon confidential and intelligence fund ni Sara Duterte. Binilyon ka piso nga kontrata man ang nagkadto sa sadto alalay ni Duterte nga si Bong Go, kag iban pa nga mga alyado.

Sa atubang sang nagalapnag nga mga ulu-estorya agud buslan ang nagahari nga rehimen, ginpakita sang imperyalismong US nga malig-on sini nga ginasuportahan ang papet sini nga si Marcos. Sang sini lang, personal nga ginbisita sang isa ka opisyal sang embahada sang US ang hearing sa ICI bilang pamatuod sang iya suporta.

Grabe ang kaugot sang pumuluyo nga sa pihak sang grabe nga kaakig sa korapsyon, garapalan nga ginsulit ni Marcos kag mga alipures sini sa Kongreso ang pagsingit sang nanari-sari nga pork barrel sa badyet sa 2026. Pilit nga ginapasulod ang ₱281 bilyon nga pork barrel ni Marcos sa dagway sang unprogrammed appropriations, confidential and intelligence funds kag iban pa. Mga ₱414 bilyon naman nga pork barrel ang tunga-tungaon sang mga korap nga mga kongresista kag senador.

Padayon nga nagakabuyagyag kon paano ang tanan nga programa sang gobyerno puno sang korapsyon. Magluwas sa mga proyektong flood control, binilyon ka piso man ang ginakawat sa mga farm-to-market road, multipurpose building, health center, taytay, dalan, subongman sa pangpubliko nga pondo para sa ayuda, sweldo, pensyon kag insurance.

Kahibalo gid ang pumuluyo kon kanday sin-o kag diin na ang mga proyekto nga ini nga ginakurakot sang mga korap nga opisyal sang gobyerno kag militar kag mga kakunsabo nila nga mga dalagko nga negosyante. Sa pagbinuligay sang lain-lain nga sektor nagakadapat lang nga kalkalon ang mga ini, i-dokumento, ibuyagyag kag itampa sa mga kriminal nga burukrata-kapitalista.

Indi dapat nga bayaan sang mga Pilipino ang pagpanukot kag pagpasabat sa mga burukrata sa ila mga hublag kag protesta. Kabulig ang mga pamatan-on, dapat mas nga pabaskugon sang masang imol nga anakbalhas kag mga mamumugon ang ila tingog batuk sa korapsyon, burukrata kapitalismo kag pasismo, kag para palanugon ang singgit para sa pagtapos sa paantos nga rehimen US-Marcos kag paghari-hari sang hubon Duterte.

Mas maglapnagon pa ini sa mga imol sa komunidad kag pabrika, kon diin pinakadamo kag pinaka-akig ang masang anakbalhas nga biktima sang korapsyon kag himbunanay sang mga burukrata-kapitalista kag mga dalagko nga negosyante. Magluwas sa hambalanon sa pagbaha sa mga komunidad nga bunga sang korapsyon kag palpak nga gobyerno, dapat patingkaron ang hambalanon sang manubo nga sweldo, lapnagon nga kawad-on sang trabaho sang mga pamatan-on, mataas nga presyo sang mga balaklon, mataas nga gasto sa edukasyon, wala-puas nga pagsaka sang presyo sang gasolina, palpak nga sosyal nga serbisyo kag iban pa nga bunga sang himbunanay sang mga korap nga burukrata-kapitalista kag sakon sa ganansya nga mga dalagko nga burgesya.

Palaparon pa ang kahublagan protesta batuk sa korapsyon sa pinakadamo nga probinsya, banwa kag syudad. Minilyon ang biktima sang palpak kag indi magamit nga mga imprastruktura nga gin-uyangan sang kwarta sang pumuluyo. Tipunon ang ila kaakig sa mga trahedya nga gina-agum nila sa kada may kalamidad sang bagyo, linog ukon bisan simple nga pag-ulan. Pasabton ang mga burukrata-kapitalista sa krimen nila nga kabangdanan sa pagkalumos sa baha sang bug-os nga komunidad kag mga ulumhan, pagkarumpag sang mga taytay, pagkaguba sang mga karsada, pagkarumpag sang mga bilding kag puluy-an kag iban pa. Dako ang angot sa burukrata kapitalismo sang pagkapierde sang mga mangunguma, manubo ang sweldo sang mga mamumugon, pagbulusok sang kita sang mga drayber, pagsangyad sang palangabuhian sang mga imol, pagkadula sang puluy-an, pagkalubong sa utang, dislokasyon kag pagpalayas sa duta, kag madamo pa nga nawong sang kaimolon.

Dapat isahon ang kusog sang kubay sang mga estudyanteng pamatan-on kag iban pa nga sektor nga nagatindog batuk sa korapsyon sa kusog sang masang anakbalhas sa kasyudaran kag kaumhan. Kon may grabe nga ginakahadlukan si Marcos nga magatay-og sa iya paghari, amo ang dululungan nga pag-walkout sa mga eskwelahan, pag-alsa sang mga mamumugon, martsa sang mga mangunguma, welga sang mga empleyado sang gobyerno, manunudlo kag akademiko, untat-byahe sa pangpubliko nga transportasyon kag iban pa nga dagway sang ululupod nga hublag sang pumuluyo.

Malig-on nga nagasulong ang nagaragasa nga kahublagan protesta sang pumuluyo batuk sa korapsyon kag burukrata kapitalista tungod sa pagpanguna sang pungsodnon-demokratiko nga organisasyon kag alyansa. Sila ang pinaka-determinado kag pinakapursigido sa paglab-ot kag pagpukaw sa masa. Sila ang mas nga nagapanikasog nga tukuron ang pinakalapad nga paghiliusa sang pumuluyo batuk sa rehimen US-Marcos.

Samtang ginapabulwak ang kahublagan protesta, dapat idungan sang mga pungsodnon-demokratikong pwersa ang mapagsik nga kahublagan pagtuon sa katilingban kag rebolusyon Pilipino sa kubay sang masa. Dapat wala sang pagkataka nga ipahangup nga ang korapsyon kag mga anomaliya duna sa mala-kolonyal kag mala-pyudal nga sistema, kag matapos lang ini sa pagbagsak sang imperyalismo, pyudalismo kag burukrata kapitalismo.

Ang handum sang pumuluyo nga pagbag-o sang sistema malab-ot lang sa pagsulong sang demokratikong rebolusyon sang banwa paagi sa armadong paghimakas. Gani dapat tukuron ang pinakadamo nga tsapter sang mga organisasyon sang National Democratic Front sa ila kubay kag pursigido nga suportahan kag pabaskugon ang Bagong Hukbong Bayan. Dapat padalumon kag palaparon ang pag-ugat sang Partido sa kubay sang masa agud magserbe nga taludtod kag ubod sang ila pangmalawigon nga paghimakas.