Halin Septyembre, anum ka salakyan pangdagat na halin kuno sa Venezuela ang ginpalupok sang US sa Carribean Sea sa akusasyon nga ini naga-unod sang mga “narko-terorista” kag nagabyahe sang iligal nga droga. Ginpatigayon ang mga pagpalupok bilang kabahin sang panibag-o nga serye sang agresyon militar sa Venezuela nga wala sang basehan nga gina-akusaran sang presidente sang US nga si Donald Trump nga nagasuporta sa mga “narko-terorista.” Naglab-ot na sa 27 ang ekstra-hudisyal nga ginpamatay sang US sa mga pag-atake nga ini.

Kadungan sang mga pagpalupok, ginpasingki sang US ang presensyang militar sang US sa Caribbean Sea paagi sa pagpadala sang mga warship, isa ka nuclear-powered nga submarino, kag iban pa nga salakyan pang-gyera. Nagpalupad man ini sang mga helikopter, fighter jet kag mga B-52 bomber sa internasyunal nga kahawaan malapit sa Venezuela.

Ginmanduan man ni Trump ang Central Intelligence Agency nga maglunsar sang mga sekreto nga operasyon sa sulod sang Venezuela batuk sa gobyerno kag pumuluyo sini. Santo ini sa anunsyo ni Trump nga patigayunon ang mas pa nga aksyon militar batuk sa Venezuela kag padihot nga buslan ang rehimen sa soberano nga pungsod. Nagpatong pa sang $50 milyon nga padya si Trump para sa pag-aresto sang presidente sang Venezuela nga si Nicolas Maduro. Dugang ang mga ini sa nagaluntad nga mga sangsyon sa ekonomiya nga madugay na nga ginpatuman sang US kag alyado sini sa pungsod.

Kakunsabo sang imperyalismong US sa kampanyang agresyon ang mga maka-Tuo nga grupo sa sulod sang Venezuela. Sadtong una nga semana sang Oktobre, ginbuyagyag sang gobyerno ni Maduro ang pagtilaw sang mga grupo nga ini nga magpatigayon sang isa ka operasyon “false flag” kon diin magatanum kag magapalupok ini sang bomba sa embahada sang US sa Caracas, sentro sang Venezuela, agud mas pa painiton ang tensyon.

Bisan sirado ang embahada halin sang nautod ang diplomatiko nga relasyon sang Venezuela kag US sadto pang 2019, may mga empleyado kag pwersa sa seguridad nga nagapabilin sa bilding. Suno sa balita nga ini, ginpa-untat ni Trump ang ano man nga pagtinguha sang iya gobyerno nga makig-estorya kag makig-relasyon sa Venezuela.

Wala nagpatay-og ang Venezuela kag gobyernong Maduro sa mga pag-atake kag pagpamahog ni Trump. Suno kay Maduro, “indi gid sila makasulod sa Venezuela” kag handa nga pangapinan sang militar kag pumuluyong Venezuelan ang ila pungsod kag sobereniya.

Pangkalibutan nga suporta sa Venezuela

Lapnagon nga ginbatikos sang mga grupo sa bug-os nga kalibutan ang agresyon sang US kag ni Trump sa Venezuela. Nagapanawagan ang International League of Peoples’ Struggle (ILPS) nga pakig-awayan ang pagtilaw nga buslan ang gobyerno sang Venezuela kag tanan nga porma sang hybrid nga pakig-gyera nga nagsingki sa idalum ni Trump.

Wala-untat ang agresyon sang US sa gobyerno sang Venezuela halin sang magtindog ini batuk sa mga imperyalistang dikta sini. “Wala sang untat ang pagtinguha sang US nga pukanon ang demokratikong ginpili nga gobyerno sang Venezuela, determinado nga higupon ang kita halin sa lana sang pungsod agud pamanggaron ang mga monopolyo kapitalista kag mga nagapangapital,” suno sa ILPS.

Pahayag sang grupo, ang agresyon sang US magatulod lang sa nagadamo nga pumuluyo sang kalibutan nga suportahan ang Venezuela kag ila makatarungan nga paghimakas para sa pungsodnon nga sobereniya batuk sa imperyalismong US.

Sa Pilipinas, ginpangunahan sang Philippine-Bolivarian Venezuela Friendship Association kag Bagong Alyansang Makabayan ang pagsuporta sa gobyerno kag pumuluyo sang Venezuela. Hugot sila nga nagapakig-angot kay Chargé d’Affaires Richard Espinoza Lobo sang Bolivarian Republic of Venezuela Embassy para sa lain-lain nga mga aktibidad kag pagtililipon.

Lakip na diri ang pakig-sinapol nila sa mga tiglawas sang Makabayan Bloc sa House of Representatives sadtong Oktobre 13. Nahimo man ang plano nga pagsumiter sang Makabayan Bloc sang isa ka resolusyon sa Kongreso para batikuson ang militarismo sang US kag suportahan ang paghimakas sang pumuluyong Pilipino para sa kalinong, pungsodnon nga sobereniya kag kinamatarung sa kaugalingon nga pagbuot sa tanan nga mga pungsod.