Sa atubang sang nagasingki nga pasismo sang rehimen Marcos, labi nga nagabalingaso ang rebolusyonaryong determinasyon sang mga manunudlo, doktor, nars, siyentista, inhinyero kag iban pa nga propesyunal nga magpakigbahin kag magsuporta sa inaway banwa. Tayuyon na nila nga ginapabaskog ang ila matag-rebolusyonaryong organisasyon para magserbe nga bubon sang suporta kag bag-o nga hangaway sang Bagong Hukbong Bayan (BHB).

Sa inspirasyon sang kahublagan panadlong sang Partido, liwat ginpabaskog ang Katipunan ng mga Gurong Makabayan (Kaguma), Makabayang Samahang Pangkalusugan (MSP) kag Liga ng Agham para sa Bayan (LAB). Mapagsik nga nagapahayag ang ining mga organisasyon sang mga mainit nga mga hambalanon pungsodnon. Regular ukon permi nila ginapaguwa ang ila mga pangmasa nga rebolusyonaryong pahayagan: Ang Rebolusyonaryong Lunas at Dagling Lunas (MSP), Liyab (Kaguma) kag Agham Bayan (LAB).

Mga makipungsodnon nga manunudlo

Sadtong Enero, gintukod sang Kaguma ang isa ka bag-o nga tsapter sa isa ka unibersidad. Lakip sa napilian bilang opisyal sang tsapter ang bag-o nga katapo sini nga si Ka Amber nga narekrut sadtong ulihi nga bahin sang 2024. “Nagapangapa pa ako sa subong apang bisan san-o man wala ako nakabatyag nga kulang ako bisan bag-o pa lang ako tungod sa maayo nga pakig-relasyon kag pag-alalay sang mga kaupod,” suno kay Ka Amber.

Sa atubang sang madamo nga trabaho kag mga personal nga gina-atubang sa kabuhi, nagatinguha siya para tayuyon nga magtungod sa katungdanan bilang opisyal sang tsapter. Suno sa iya, ginahimo niya ini nga may pagsalig kag pag-uyat sa mga prinsipyo kag pagsabat sa pamangkot “nga-a” kag “para kay sin-o.”

Suno sa Kaguma, kinahanglan nga pabaskugon sini ang kaugalingon agud lubos nga makapakigbahin sa armadong paghimakas, mag-amot sa BHB, kag magbulig sa pag-organisa sa kaumhan para sa pagpanday sang rebolusyonaryong paghiliusa kag paghimakas sang pumuluyo.

Pagbulong sa krisis sang sosyedad

Sa isa ka larangan gerilya sa Luzon, nagsulod ang isa ka grupo sang MSP nga ginabug-os sang mga doktor, propesyunal kag mga estudyanteng pang-ikaayong-lawas para magpatigayon sang isa ka misyon medikal para sa masa kag hukbo. “Sa pagsulod sa sona, indi mahapos ang amon mga naaguman kag nangin inagihan ilabi na nga kasagsagan sang mabaskog nga pag-ulan,” pagpaambit sang isa ka doktor.

Gintukod nila ang klinik kon diin pagahiwaton ang konsultasyon sa mga pasyente kag paganahon ang gamay nga laboratoryo. Ginsabat sang MSP ang mga simple kag kumplikado nga mga balatian sang mga Pulang hangaway, pisikal man kag panghuna-huna (mental).

Sa sulod sang hukbo, na-eksperyensiyahan nila ang simple nga pangabuhi, ang mga sakripisyo sa pagsulong sang inaway banwa kag ang mainit nga pagbaton sang masang mangunguma. “Ang ining akon mga ekperyensiya ang mas pa nga magpalig-on kag magpakalayo sang akon rebolusyonaryong espirito.” estorya pa sang doktor.

Samtang, naglunsar sang asembliya sadtong Agosto 2 ang mga estudyante pang-ikaayong-lawas halin sa lain-lain nga unibersidad para tukuron ang isa ka tsapter sang MSP. Dako nga tikang ini para sa pagpahakus sang MSP sa mga estudyante pang-ikaayong-lawas sa demokratikong rebolusyon sang banwa.

Mga siyentista para sa DRB

Anum ka bulan ang programa para sa tour-of-duty (TOD) sa BHB ni Ka Langga, katapo sang LAB kag isa ka anay estudyante sa kurso nga computer engineering sa isa ka pribado nga unibersidad. Sa panahon nga ini, nag-usbong ang iya kagustuhan nga magserbe nga lubos panahon sa kaumhan. “Sadtong nag-TOD ako, mas napalig-on ang desisyon nga magpultaym tungod lubos ko nakita kag napamatud-an ang kahustuhon kag kinahanglanon nga mag-alagad bilang hangaway,” siling niya.

Nakita niya mismo ang mainit nga pagbaton kag pagpalangga sang masa sa hukbo sang banwa sa larangan nga iya ginahulagan. “Sila, nga pinakaginahimuslan sa sosyedad, may ikasarang pa nga pakaunon ang mga hangaway, magbulig sa pagkuha sang suplay para mapabilin ang hukbo, kag magpakigbahin sa mga rebolusyonaryong hilikuton,” estorya niya.

Sa kasyudaran, padayon man nga ginapanday sang LAB ang mga aktibista kag kadre sini bilang mga pultaym nga organisador sa sektor. Pamaagi man ini agud pasakaon ang kamuklatan kag kahandaan sang iya mga katapo nga usoyon ang banas sang armadong paghimakas kaangay ni Ka Langga.

Ginkuha sa Liyab, Ang Rebolusyonaryong Bulong kag Siyentista sang Banwa.