Gawas sa protesta sa mga kabatan-onan ug estudyante, nagpadayon usab ang protesta batok sa korapsyon sa mga mamumuo, kabus sa kasyudaran, mag-uuma, mangingisda, tawong-simbahan ug uban pang sektor. Matud nila, magpadayon ang mga protesta hangtud walay manubag nga mga korap sa ilang mga krimen batok sa katawhan.

Niadtong Oktubre 7, mikabat sa 17,000 ang misalmot ug miduyog sa martsa ug misa sa Baguio City. Duha ka adlaw human niini, nagmartsa usab ang mga residente sa San Jose Del Monte City sa Bulacan.

Niadtong Oktubre 11, kapin 3,000 ang mitambong sa pag-ampo batok sa korapsyon sa Bacolod City. Sa samang adlaw, liboan ka mga debuto ug tawong-simbahan ang miapil sa pagbaktaw para sa hustisya batok sa korapsyon sa Sampaloc sa Maynila. Gilunsad usab sa Albay ang usa ka martsa.

Niadtong Oktubre 12, naglunsad og baktas batok sa korapsyon sa Santiago City, Isabela diin kapin 500 ang miapil sa aktibidad. Sa susamang adlaw, gipahigayon usab ang usa ka rali sa Meycauayan, Bulacan. Duha ka adlaw human niini, gipahigayon ang fluvial parade sa Manila Bay sa mga mangingisda sa Cavite.

Niadtong Oktubre 17, nagkasa og protesta ang mga unyon sa mga mamumuo ilalum sa Kilusang Mayo Uno sa Laguna. Usa ka rali usab ang gipahigayon sa mga progresibong grupo sa Cebu niadtong adlawa. Usa ka adlaw pagkahuman, gipahigayon ang usa ka protesta sa La Trinidad Public Market sa Benguet.

Niadtong Oktubre 19, liboan ang mitambong sa martsa ug pag-ampo batok sa magun-ubong dredging, korapsyon ug dinastiya sa pulitika sa Vigan City, Ilocos Sur. Human sa usa ka adlaw, gipahigayon sa mga inahan ug babaye ang usa ka zumba batok sa korapsyon sa Quezon City.

Nagpadayon usab ang Black Friday Protest sa mga progresibong grupo. Gilunsad usab sa simbahan ning bag-o ang ilang bersyon sa protesta matag Biyernes.

Gipahibalo sa United People Against Corruption niining bulana ang plano nga magpasaka og indemnity class suit batok sa mga kongresista, kontratista ug upisyal sa gubyerno nga nalambigit sa mga anomalya sa mga flood control project.

Sa Hong Kong ug Canada, gitukod usab sa mga grupong Pilipino niining Oktubre ang mga alyansa nga kontra sa korapsyon sa Pilipinas.