Kapin sa 5,000 ka pamatan-on ang nagmartsa padulong sa Mendiola sa Manila sadtong Oktobre 17 bilang kabahin sang National Youth Day of Action Against Corruption. Sa pagpanguna sang mga pungsodnon-demokratiko nga organisasyon, mga konseho sang mga estudyante kag alyansa, singgit sang pamatan-on: “Marcos-Duterte, Kakason! Dunot nga sistema, bag-uhon!”

Nag-walkout ang mga estudyante kag naglunsar sang lokal nga programa sa ila matag-unibersidad antes magkadto sa Mendiola. Nagpakigbahin sa hublag ang mga grupo kag estudyante halin sa 28 ka pangpubliko kag pribado nga unibersidad sa Metro Manila.

Ginkasa man sang mga estudyante ang walkout kag mga piket protesta sa Baguio City, Nueva Ecija, Rizal, Cavite, Batangas, Laguna, Quezon, Cebu City, Iloilo City kag Davao City. Upod diri ang masobra 700 ka estudyante, manunudlo kag empleyado nga nag- walkout sa Central Luzon State University sa adlaw nga ini.

Pila ka adlaw antes sini, separado nga walkout ang ginlunsar sang mga estudyante sang Polytechnic University of the Philippines (PUP) System (15,000), De La Salle University sa Manila kag Laguna, sa University of the East (UE)-Manila, Our Lady of Fatima University, De La Salle-College of St. Benilde kag Mapua University. Nag-walkout man ang mga estudyante sang De La Salle Araneta University sa Malabon City sadtong Oktobre 20. Sa kabug-osan, ginabana-bana nga kapin 40,000 ka estudyante sa bug-os nga pungsod ang nagpakigbahin sa kahublagan walkout kontra korapsyon halin Septyembre.

Indi matay-og ang pamatan-on sa atubang sang pagtinguha sang rehimen Marcos nga ipiton sila. Padayunon nila ang mga protesta sa pihak sang nareport nga asod-asod nga “bomb threat” sa mga unibersidad kag eswelahan sa madamo nga probinsya sa katuyuan nga idiskaril ang nagadamo kag nagasunod-sunod nga mga hublag.

Ginbatikos man nila ang pagpang-ipit sang estado, lakip ang pagpatawag sang Philippine National Police sa mga lider pamatan-on kag mamalitha pang-kampus tungod sa pagka-imbolbar sa protesta kag banggaan sa Mendiola, Manila sadtong Septyembre 21. Lakip sa mga ginpatawag sang mga pulis ang isa ka mamalitha kag estudyante sang PUP kag organisador sang grupo sang Kalayaan Kontra Korapsyon (Kahilwayan Kontra Korapsyon).

Sadtong Oktobre 12, nagtipon ang mga biktima sang kalakasan sang mga pulis, madamo mga pamatan-on, sa protesta sang Septyembre 21 nga ginbansagan nga Mendiola 277. Upod sa ila mga himata, mga abogado kag grupo sang tawhanon nga kinamatarung, gintukod nila ang Alyansa batuk sa Korapsyon kag Brutalidad sang Pulis ukon AKAB.