Gingamo kag ginhadlok sang mga elemento sang Armed Forces of the Philippines ang mga delegado sang International Solidarity Mission (ISM) nga naglunsar sang imbestigasyon kag pagtuon halin Oktobre 11 tubtob 14. Yara sa Pilipinas ang delegasyon agud hibaluon ang gina-antus nga krisis sa klima, pagpangkawkaw sa kapalibutan, kag militarisasyon sa komunidad sang mga mangunguma kag tumandok sa Rizal, kag sa mga isla sang Mindoro, Samar, Leyte kag Negros.

Hayagan nga ginpanilagan kag ginkuhaan sang litrato sang mga soldado ang mga ginhiwatan sang aktibidad sang ISM. Ginkuha nila ang ngalan sang mga delegado, ginsundan sang mga armado kag ginbantayan tubtob sa ila ginatineran. Pila ka beses man nga nagpalupad sang drone sa ibabaw sang mga kampuhan kon diin ginahiwat ang imbestigasyon.

Sadtong Oktobre 14, napilitan ang mga delegado nga tapuson sang mas temprano ang aktibidad sini sa Mindoro tungod sa pag-abot sang puluan ka pulis kag soldado nga may bitbit nga mga malagba nga pusil sa kampuhan. Nagtuga ini sang grabe nga kahadlok sa mga tumandok kag delegado. Sa Rizal, lubos sila nga gindumilian nga magpatigayon sang aktibidad tungod wala sila sang “permit.” Paghalin sang mga nagbisita nga delegasyon, tayuyon nga gingamo sang mga soldado ang mga tumandok nga Mangyan sa Mindoro kag Dumagat sa Rizal.

Suno sa report sang mga tumandok nga Dumagat sa Tanay, Rizal masami na ang presensya sang militar sa komunidad kag nagsugod nga magpatawag sa mga residente para sa interogasyon pagkatapos sang ISM. Sa Abra de Ilog, Occidental Mindoro, nagpadayon ang pagpang-ipit sang mga soldado sa komunidad nga naka-apekto sa pangabuhian sang mga residente kag nagtuga sang gutom sa mga mangunguma.

Kadungan sa pagpang-ipit sa ISM, wala-untat man ang pagpang-abuso militar sa iban pa nga bahin sang pungsod.

Pasista nga pagpang-atake sa Negros. Wala-untat ang pagpanalasa kag pasista nga pag-atake sang mga soldado sa isla sa nagligad nga bulan. Nalista ang sampaw-sampaw nga mga kaso sa paglapas sa tawhanon nga kinamatarung sa kasagsagan sang mga operasyon kombat sini sa madamo nga barangay.

Pinaka-ulihi sa mga ini ang pagpaniro sang 79th IB nga nagtuga sang pagkapilas sa mangunguma nga si Kato Rizal kag iya menor-de-edad nga hinablos samtang nagakuha sang dugos sa Sitio Nabaisan, Barangay Minapasok, Calatrava, Negros Occidental sadtong aga sang Oktobre 17. Sa ulihi nga report wala pa mahibaluan kon diin na ang menor-de-edad.

Sadtong Oktobre 7, gin-ransak sang 94th IB ang balay sang isa ka mangunguma sa Sityo Manluki sa Barangay Carabalan. Isa man ka mangunguma ang gin-abdak sang 94th IB sa Barangay Buenavista kag pwersa siya nga ginpagiya sa operasyon kombat. Sa Toboso, pilit nga ginsulod kag gin-ransak sang 79th IB ang balay sang duha ka mangunguma sadtong Oktobre 11. Sa Negros Oriental, nareport man ang pagpangbaluskay kag pagkampo sang 62nd IB sa mga sentro sang komunidad, simbahan kag eskwelahan.

Paglapas sa IHL. Ginpabudlayan kag gin-ipit sang 703rd IBde ang pamilya kag mga grupo sa tawhanon nga kinamatarung sa pagbawi sa bangkay sang isa ka ginasiling nga Pulang hangaway nga napatay sa inaway sang militar kag BHB sa Norzagaray, Bulacan sadtong Oktobre 17. Ginkundenar sang mga grupo sa tawhanon nga kinamatarung ang pagpamalibad sang militar nga ihatag sa pamilya ang bangkay kag militarisasyon sa punerarya nga ginhayaan sini. Lain-lain man ang estorya sang militar tuhoy sa natabo nga inaway kag pagdul-ong sa bangkay.

Sa North Caloocan, nagsingki ang militarisasyon sang NTF-Elcac kag sang 12th Civil Military Operation sa mga barangay sugod sadtong Oktobre 6. Ginsakop sang militar ang Barangay 175, 181-182 Pangarap Village kag Barangay 187-188. Ginlunsar sini ang kampanya sang Red-tagging kag pagpang-ipit sa mga katapo sang progresibo nga grupo.

Pagpatay. Brutal nga ginpatay sang mga lalaki nga sakay sa motorsiklo si Niruh Kyle Antatico sadtong Oktobre 10 sa Barangay Patag, Cagayan de Oro City. Si Antatico anay senior legal researcher sa National Irrigation Administration Region 10 nga siling nagbuyagyag sang tuman ka damo nga korapsyon kag anomaliya sa sulod sang ahensya lakip ang nadula nga pondo, substandard nga proyekto, kag mga peke nga kontrata. Nagapanawagan sang hustisya ang Nafeda-Courage para kay Antatico.