Gawas ha paggios han mga kabatan-unan ngan estudyante, nagpapadayon liwat an protesta nga kontra korapsyon han mga trabahador, kablas ha syudad, parag-uma, parupangisda, tawo ha singbahan ngan iba pa nga sektor. Sering nira, magdidirudiretso an mga protesta tubtub nga waray napapagbaton nga mga korap ha ira krimen ha katawhan.

Hadton Oktubre 7, inabot ha 17,000 an tinambong ngan nakig-usa ha martsa ngan misa han katawhan ha Baguio City. Kataliwan han duha kaadlaw, duruyog nga nagmartsa an mga residente han San Jose Del Monte City ha Bulacan.

Hadton Oktubre 11, masobra 3,000 an tinambong ha pangadi kontra korapsyon ha Bacolod City. Hiton liwat nga adlaw, yukut-yukot nga deboto ngan tawo ha singbahan an pinartisipar ha usa nga lakat para ha hustisya kontra ha korapsyon ha Sampaloc ha Manila. Iginlansar liwat ha Albay an usa nga martsa.

Hadton Oktubre 12, naglansar hin lakat kontra korapsyon ha Santiago City, Isabela diin masobra 500 an pinartisipar ha aktbidad. Hiton gihapon nga adlaw, usa nga rali an utro nga iginlansar ha Meycauayan, Bulacan. Kataliwan han duha kaadlaw, naglansar hin fluvial parade ha Manila Bay an mga parupangisda han Cavite.

Hadton Oktubre 17, naglansar hin protesta an mga unyon han trabahador ilarum han Kilusang Mayo Uno ha Laguna. Usa nga rali liwat an iginlansar han mga progresibo nga grupo ha Cebu hito gihapon nga adlaw. Kataliwan han usa kaadlaw, iginlansar an usa nga protesta ha La Trinidad Public Market ha Benguet.

Hadton Oktubre 19, yukut-yukot an pinartisipar ha martsa ngan pangadi kontra ha mapanhibang nga dredging, korapsyon ngan dinastiya ha pulitika ha Vigan City, Ilocos Sur. Kataliwan han usa kaadlaw, iginlansar han mga iroy ngan kababayin-an an usa nga zumba kontra korapsyon ha Quezon City.

Nagpapadayon liwat an Black Friday Protest han mga progresibo nga grupo. Iginlansar naman han singbahan diri pala maiha an bersyon han paggios kada Biyernes.

Igin-anunsyo naman han United People Against Corruption hini nga bulan an plano nga magsalawad han usa nga indemnity class suit kontra ha mga kongresista, kontratista ngan upisyal han gubyerno nga dabi ha maanomaliya nga mga proyekto nga flood control.

Ha Hong Kong ngan Canada, ginbug-os liwat han mga grupo nga Pilipino hini nga Oktubre an mga alyansa nga natipa ha anomaliya ha Pilipinas.