Aksyon kontra demolisyon sa Marikina. Napunggan sang mga residente sang Agora,Barangay Sto. Niño, Marikina City ang plano nga demolisyon sa ila komunidad sadtong Oktobre 15. Nagpatindog sila sang kampuhan sadtong Oktobre 14. Masobra 53 ka imol nga pamilya ang may peligro nga mapalayas sa komunidad sa pihak sang ila masobra 40 ka tuig nga pagpuyo sa lugar. Tungod sa protesta, nagpangako ang lokal nga gobyerno sang relokasyon para sa mga apektado nga residente.

Barikada sa Benguet. Naglab-ot sa 400 ka residente sang duha ka barangay sa Mankayan, Benguet ang nagbarikada sadtong Oktobre 13 batuk sa pagpasilabot sang Crescent Mining and Development Corporation sa ila duta nga ginpanubli. Nagserbe man ini nga pormal nga pagtukod sang alyansa No Mines Movement of Guinaoang and Bulalacao.

Hublag kontra-mina sa Dupax del Norte, NV. Sugod Septyembre 17 nagpatindog sang barikada ang mga residente sang Barangay Bitnong sa Dupax del Norte sa Nueva Vizcaya batuk sa Woggle Corporation. Nagsingki ang gitgitanay sang mga residente kag kumpaniya sang magpaguwa ang isa ka korte sa probinsya sang Temporary Restraining Order sadtong Oktobre 14 batuk sa barikada. Ginbungkag sang mga pulis ang barikada sadtong Oktobre 16 kag gin-aresto ang tatlo ka residente. Gilayon man sila nga nahilway.

Wala-tuo nga ginkundenar sang mga residente, simbahan, grupo kag indibidwal ang kalakasan sang pulis. Naglunsar sila sang karaban kag protesta sa Nueva Viscaya Provincial Capitol sadtong Oktobre 20 agud kundenaron ang kawad-on sang aksyon sang lokal nga gobyerno. Naglunsar man sang hublag sa amo nga adlaw ang Kalikasan PNE sa atubang sang Department of Environment and Natural Resources.

Natalana man nga maglunsar sang protesta sa Oktobre 21 ang Anakbayan United Kingdom kag iban pa nga pungsodnon demokratikong organisasyon sa UK sa opisina sang Metals Exploration PLC Office sa London agud kondenaron ang pagpangkawkaw sa kapalibutan sang ila kumpaniya.