Naglunsar sang isa ka semana nga protesta ang mga organisasyon sang mga mangunguma kaupod ang lain-lain nga sektor bilang pagdumdom sang bulan sang mga pesante. Agud patingkaron ang panawagan sang mga mangunguma, gintukod nila ang kampuhan sa atubang sang Department of Agrarian Reform Central Office sa Quezon City halin Oktobre 15 tubtob 21. Ginlunsar sa kampuhan ang pagbisita, pakig-isa kag talakayan kaupod ang lain-lain nga sektor. May yara man workshop, medical mission kag paghatag sang materyal nga suporta sa mga mangunguma.

Magluwas diri, isa ka rali ang ginpangunahan sang Amihan sadtong Oktobre 15 para dumdumon ang Pangkalibutanon nga Adlaw sang Kababaehan nga Mangunguma. Sadtong Oktobre 16, nagmartsa liwat ang mga grupo sa Quezon City sa pagpangunga sang mga mangunguma halin sa isla sang Negros para sa Pangkalibutanon nga Adlaw sang Kagutuman. Pagkasunod nga adlaw, nagprotesta sila sa hedkwarters sang Armed Forces of the Philippines sa Quezon City agud kundenahon ang militarisasyon sa kaumhan. Isa ka gab-i sang pagpasundayag ang ginlunsar nila kag sang mga grupo sang artista sadtong Oktobre 19 sa UP Diliman. Nagprotesta man sila sa Department of Social Welfare and Development sadtong Oktobre 20 agud igiit ang kumpensasyon para sa kahalitan nga dulot sang kalamidad.

Maga-kulminar ang protesta sang mga mangunguma sa Oktobre 21, anibersaryo sang bogus nga reporma sa duta sang Presidential Decree No. 27 ni Marcos Sr. Maga-hublag sila kaupod ang iban pa nga sektor sa Liwasang Bonifacio batuk sa korapsyon sang rehimen Marcos kag hubon Duterte. Ginpanawagan nila ang pagpahalin sa poder sang duha ka lider sang kurakot.