Masobra 5,000 nga kabatan-unan ngan estudyante an nagmartsa ngadto ha Mendiola ha Manila hadton Oktubre 17 komo parte han National Youth Day of Action Against Corruption. Ha pangunguna han mga nasyunal-demokratiko nga organisasyon, mga konseho han estudyante ngan alyansa, guliat han kabatan-unan: “Marcos-Duterte, tanggalon! Dunot nga sistema, bag-uhon!”

Nag-walkout an mga estudyante ngan naglansar hin lokal nga programa ha kada tagsa nira nga mga unibersidad antes kumadto ha Mendiola. Pinartisipar ha paggios an mga grupo ngan estudyante tikang ha 28 nga pampubliko ngan pribado nga unibersidad ha Metro Manila.

Iginlansar liwat han mga estudyante an walkout ngan mga piket protesta ha Baguio City, Nueva Ecija, Rizal, Cavite, Batangas, Laguna, Quezon, Cebu City, Iloilo City ngan Davao City. Landaw dinhi an masobra 700 nga estudyante, magturutdo ngan empleyado nga nag-walkout ha Central Luzon State University hiton nga adlaw.

Pira kaadlaw antes hini, bulag nga walkout an iginlansar han mga estudyante han Polytechnic University of the Philippines (PUP) System (15,000), De La Salle University ha Manila ngan Laguna, ha University of the East-Manila, Our Lady of Fatima University, De La Salle-College of St. Benilde ngan Mapua University. Nag-walkout liwat an mga estudyante han De La Salle Araneta University ha Malabon City hadton Oktubre 20. Ha kabug-usan, gintatantiya nga masobra 40,000 nga estudyante ngan kabatan-unan ha bug-os nga nasud an pinartisipar ha kagiusan nga walkout kontra korapsyon tikang Septyembre.

Diri nagpapabantad an kabatan-unan atubangan han pag-aatentar han rehimen Marcos nga puypuyon hira. Iginpadayon nira an mga protesta ha luyo han nahireport nga susrunod nga mga “bomb threat” ha mga unibersidad ngan eskoylahan ha damo nga prubinsya ha tuyo nga idiskaril an natikadamo ngan natikaagsub nga mga paggios.

Ginsukna liwat nira an panmuypoy han estado, kalakip an pagpapatawag han Philippine National Police ha mga lider kabatan-unan ngan mamamahayag nga pankampus tungod ha pagkakadabi ha protesta ngan banggaay ha Mendiola, Manila hadton Septyembre 21. Kaupod ha mga iginpatawag han mga pulis an usa nga mamamahayag ngan estudyante han PUP ngan organisador han grupo nga Kalayaan Kontra Korapsyon.

Hadton Oktubre 12, nagtirok an mga biktima han kamadarahug han mga pulis, damo an kabatan-unan, ha protesta nga Septyembre 21 nga ginbansagan nga Mendiola 277. Kaupod an ira mga kaurupdan, mga abugado ngan grupo ha tawhanon nga katungod, ginbug-os nira an Alyansa laban sa Korapsyon at Brutalidad ng Pulis o AKAB.