Kapin 5,000 ka kabatan-onan ug estudyante ang nagmartsa paingon sa Mendiola sa Maynila niadtong Oktubre 17 isip kabahin sa National Youth Day of Action Against Corruption. Gipangunahan sa mga nasudnon-demokratikong organisasyon, mga konseho sa mga estudyante ug alyansa, ang panawagang: “Marcos-Duterte, pahawaon! Dunot nga sistema, usbon!”

Nag-walkout ang mga estudyante ug naglunsad og lokal nga programa sa ilang mga unibersidad sa wala pa miadto sa Mendiola. Misalmot sa protesta ang mga grupo ug estudyante gikan sa 28 ka pangpubliko ug pribadong unibersidad sa Metro Manila.

Gikasa usab sa mga estudyante ang walkout ug mga piket protesta sa Baguio City, Nueva Ecija, Rizal, Cavite, Batangas, Laguna, Quezon, Cebu City, Iloilo City ug Davao City. Tataw dinhi ang kapin 700 ka estudyante, magtutudlo ug mga empleyado nga nag-walkout sa Central Luzon State University sa maong adlawa.

Pipila ka adlaw ayha niini, naglunsad og laing walkout ang mga estudyante sa Polytechnic University of the Philippines (PUP) System (15,000), De La Salle University sa Maynila ug Laguna, University of the East (UE)-Manila, Our Lady of Fatima University, De La Salle-College of St. Benilde ug Mapua University. Nag-walkout usab ang mga estudyante sa De La Salle Araneta University sa Malabon City niadtong Oktubre 20. Sa kinatibuk-an, gibanabana nga kapin 40,000 ka estudyante ug kabatan-onan sa tibuok nasud ang misalmot sa kalihukang walkout batok sa korapsyon sukad Setyembre.

Dili mapukan ang kabatan-onan bisan pa sa pagsulay sa rehimeng Marcos nga sumpuon sila. Gipadayon nila ang mga protesta taliwala sa mga report sa sunod-sunod nga mga “bomb threat” sa mga unibersidad ug eskwelahan sa daghang prubinsya aron pugngan ang nagkadaghan ug nagkanunay nga mga protesta.

Gisaway usab nila ang pagpanumpo sa estado, lakip na ang pagpatawag sa Philippine National Police sa mga lider kabatan-onan ug midya sa kampus tungod sa ilang pagsalmot sa protesta ug kumprontasyon sa Mendiola, Maynila niadtong Setyembre 21. Lakip sa gipatawag sa mga pulis mao ang usa ka midya ug estudyante sa PUP ug organisador sa grupong Kalayaan Kontra Korapsyon.

Niadtong Oktubre 12, nagtapok ang mga biktima sa kabangis sa mga pulis, kadaghanan kabatan-onan, sa protesta sa Setyembre 21 nga gitawag og Mendiola 277. Kauban ang ilang mga pamilya, mga abogado ug grupo sa tawhanong katungod, gitukod nila ang Alyansa laban sa Korapsyon at Brutalidad ng Pulis o AKAB.