Nasurok 5,000 kabataan ken estudyante ti nagmartsa agturong ti Mendiola idiay Manila idi Oktubre 17 kas paset ti National Youth Day of Action Against Corruption. Iti panangiyuna dagiti nailyan-demokratiko nga organisasyon, dagiti konseho dagiti estudyante ken alyansa, pukkaw ti kabataan: “Marcos-Duterte, Ikkaten! Bulok a sistema, baliwan!”

Nag-walkout dagiti estudyante ken nagiruswat kadagiti lokal a programa kadagiti unibersidad da sakbay nga agturong idiay Mendiola. Nakipaset iti tignay dagiti grupo ken estudyante manipud iti 28 a pangpubliko ken pribado nga unibersidad iti Metro Manila.

Inkasa met dagiti estudyante ti walkout ken dagiti piket protesta idiay Baguio City, Nueva Ecija, Rizal, Cavite, Batangas, Laguna, Quezon, Cebu City, Iloilo City ken Davao City. Tampok ditoy ti nasurok 700 nga estudyante, manursuro ken empleyado a nag-walkout iti Central Luzon State University iti didiay nga aldaw.

Mano nga aldaw sakbay daytoy, nakasina a walkout ti insayangkat dagiti estudyante ti Polytechnic University of the Philippines (PUP) System (15,000), De La Salle University iti Maynila ken Laguna, iti University of the East (UE)-Manila, Our Lady of Fatima University, De La Salle-College of St. Benilde ken Mapua University. Nag-walkout met dagiti estudyante ti De La Salle Araneta University iti Malabon City idi Oktubre 20. Iti kabuklan, mapatta-patta a nasurok 40,000 estudyante ken kabataan iti intero a pagilyan ti nakipaset iti tignay walkout kontra korapsyon manipud Setyembre.

Saan nga agpagungon ti kabataan iti sango ti panaggandat ti rehimen Marcos a pawilan isuda. Intuloy da dagiti protesta iti laksid ti naiyulat nga agsasaruno a “bomb threat” kadagiti unibersidad ken eswelaan iti adu a prubinsya iti gagem nga idiskaril ti umad-ado ken sumansansan a panagtignay.

Binabalaw da met ti panagipawil ti estado, kabilang ti panangpaawag ti Philippine National Police kadagiti lider kabataan ken peryodista iti kampus gapu iti pannakairaman da iti protesta ken rinnupak idiay Mendiola, Manila idi Setyembre 21. Kabilang kadagiti inpaawag dagiti pulis ti maysa a peryodista ken estudyante ti PUP ken organisador ti grupo a Kalayaan Kontra Korapsyon.

Idi Oktubre 12, nagummong dagiti biktima ti kinaranggas dagiti pulis, nga adu ket kabataan, iti protesta a Setyembre 21 a naawagan a Mendiola 277. Kadwa da dagiti kapamilya, abugado ken grupo iti karbengan-tao, binukel da ti Alyansa laban iti Korapsyon ken Brutalidad ti Pulis wenno AKAB.