Kinahanglan bug-os-kusog nga suknaon ngan atuhan an ginbug-os nga Task Force Philippines han imperyalista nga US nga gagamiton hini ha dugang nga militar nga panginginlabot ha nasud. Ha pagbubug-os han Task Force Philippines, mas butaray nga ginkokontrol han US an Armed Forces of the Philippines (AFP) ngan iba pa nga panseguridad nga pwersa han neokolonyal nga estado para magserbe ha heyopulitikal nga interes han US ha Asia.

An Task Force Philippines usa nga bag-o nga yunit han militar han US nga nakabase ha Pilipinas. Katuyuanan hini nga igtalaan an direksyon, plano ngan mga operasyon han AFP ha “pan-gawas nga depensa” tikang ha South China Sea tubtub ha Luzon Strait, kontra ha kunuhay “mapwersa ngan agresibo” nga gios han China ha kadagatan.

Dako nga buwa an deklarado nga katuyuanan hini nga “pahugton an burubligay han US ngan Pilipinas.” Pataraw-an nga gin-amin mismo han hepe han AFP nga waray hiya aram nga detalye hiunong hini nga plano nga task force han US. An aram la niya nakasubay ini ha konsepto ngan operasyon han Task Force Ayungin nga itingtukod han US hadton nakalabay nga tuig.

Igintukod an nahiuna nga task force hadton 2024 ngan ginbug-os han mga upisyal militar han US. Ini an nagplano han mga operasyon nga “resupply” han AFP ha barko hini nga BRP Sierra Madre nga nakaduong ha Ayungin Shoal. Iginpadara han US an iya higamit militar ngan armas, ngan ginsuportahan ha iya sarbeylans ha kahanginan ngan kalarakan (satellite). Ha laktud, an mga “resupply mission” han AFP mga pankadagatan nga operasyon nga direkta nga mando ngan kon-trol han US.

An pagbubug-os han Task Force Philippines an pinakaurhi nga pag-atentar han imperyalismo nga US ngan pangilal-an han mas hitaas nga balitang han panginginlabot ha nasud. Nagseserbe ini ha balayan han Indo-Pacific Strategy han US ha larang nga ensirkulohan an imperyalista nga karibal hini nga China, ngan pugngan an dugang nga pagdako han poder hini ha militar ngan ekonomiya.

Pira katuig na nga gin-gagamit ngan ginsusunghan han US an pankadagatan nga sumpakiay han Pilipinas ngan China, agud tagan rason an paggamit ha Mutual Defense Treaty ngan iba pa nga mga diri pantay nga panmilitar nga kasarabutan agud pakusgon an presensya han mga panmilitar nga pwersa ha Pilipinas. Igintindog hini an diri mamenos ha siyam nga base militar han US nga ginkikilala ilarum han Enhanced Defense Cooperation Agreement (EDCA).

Mas damo pa an diri gin-aamin nga base ngan pasilidad han US ha magkalain-lain nga parte han nasud, kalakip an igintindog nga pasilidad han AFP ha Mavulis Island ha Batanes para magamit han US. Mayda liwat presensya an militar han US ha mga pasilidad ha Ilocos Norte, ha Aurora, Quezon, Mindoro, Panay ngan makalain-lain nga parte han Palawan.

Gintatawuhan ini han mga upisyal ngan sundalo nga Amerikano, o gin-iistakan han mga armas sugad han Typhon missile system ngan iba pa nga mapandestroso nga armas. Plano liwat han US nga itindog ha nasud an mga pabrika han bala, drone ngan iba pa nga armas. Dugang pa hini an plano han US nga magtindog han refuelling depot ha hiluag nga kadagatan han Davao Gulf.

Pirmihan gihap an presensya ha kadagatan nga lupgop han Pilipinas han mga bokis de gerra han US, kalakip an mga higante nga aircraft carrier nga sakay an yukut-yukot nga sundalo nga Amerikano. Libre ini nga naglalayag ngan naduong ha diin man nga parte han Pilipinas. Gin-gagamit ini ha susrunod ngan sagunson nga iginlalansar nga pagpapahiara ha gerra ha Pilipinas, ngatanan nakapokus ha senaryo han pagbuto han gerra ha China.

Lunod-patay nga niyutiyo hi Marcos ha iya imperialista nga amo nga US. Dugang pa hiya nga nainalagad tungod ha desperasyon nga kuhaon an suporta han US. Atubangan ini han nakaladkad nga pampulitika nga krisis dara han nabuksas nga dagko nga kaso han korapsyon ngan nagpapadayon nga hiluagan nga kagiusan protesta kontra ha iya rehimen.

Ha miting hadin naglabay han ASEAN, hi Marcos an nagserbe nga tagdara han adyenda han US, ngan iginduso an sering niya nga “enhanced defense cooperation” han mga nasud ha Southeast Asia kontra ha “hulga ngan agresyon” han China. Nasupalpal hi Marcos ngan waray bisan usa nga sinuporta ha iya iginproponer.

Subay ha mando han US, susrunod nga ginsulod ni Marcos an mga kasarabutan nga “visiting forces” ha Japan ngan Canada, mga nasud nga may panmilitar nga alyansa ha US. Tuyo hini nga tugutan nga gamiton hini nga mga nasud an teritoryo nga pandagat ngan katunaan han Pilipinas para ha mga tig-ob-ha-US nga mga operasyon militar. Ha yana, iginrarakudako ni Marcos nga mapalit hiya han mga higamit pan-gerra ha US agud kunuhay makaato hin usa kabulan antes umaro hin bulig ha iba nga nasud.

Kaduyog han adyenda ni Mar-cos, nagios an magkalain-lain nga maka-US nga partido, organisasyon, mga institusyon, ngan parte han masmidya agud suportahan an natikadako nga presensya militar han US ha Pilipinas, ha tahub han pagdepensa ha “West Philippine Sea.” Ngatanan ini ginpopondohan han imperyalismo nga US ngan naagi ha mga institusyon sugad han National Endowment for Democracy ngan naawas ha grupo sugad han “INCITEgov.” Hadton 2023, nag-alutaga liwat an gubyerno han US han $1.6 kabilyon para ha 5-katuig nga programa para ha “propaganda nga kontra-China.”

Ginpapaypayan nira an Sino-phobia o an kangalas ha ngatanan nga may kalabutan ha China. Sugad kan Marcos, ginpapagawas nira nga may hulga han “pananakop” ngan “agresyon” han China, samtang mamingaw kun tiunan-o nagpapabilin nga neokolonya han imperyalismo nga US an Pilipinas. Ginpapagawas nira nga “maka-China” an hin-o man nga natipa ha mga militar nga panginginlabot han US ha Pilipinas.

Napostura yana an mga Duterte nga kontra-US agud tahuban an karukayaknon han korapsyon nga dabi an ira pamilya. Buaw ini nga pamostura. Han nakada ha poder, waray ginhimo hi Rodrigo Duterte agud ipaserra an mga EDCA site ngan hul-os nga igbasura an VFA ngan mga panmilitar nga kasarabutan ha US. Ginbuhian niya an sundalo nga Amerikano nga nagpatay kan Jennifer Laude. Mamingaw yana an mga Duterte ha plano han US nga itindog an refuelling depot ha Davao Gulf.

Atubangan han natikakusog nga duso han US para manulsol han gerra ngan danason o gamiton an Pilipinas ha pakiggerra kontra ha China, mahugot an panginahanglan nga magkaurusa an katawhan agud gumios para ulangon ngan atuhan ini.

Kinahanglan pakusgon an guliat han katawhan para bungkagon an ngatanan nga base militar han US, tanggalon an tanan nga mga misayl han US ha mga sikreto nga lokasyon ha Pilipinas, ngan palayason an nanginginlabot nga mga panmilitar nga pwersa han US ha nasud. Kinahanglan isumpay ini nga guliat ha pakigbisog han katawhan para makaalinggawas ha mga kuko han imperyalista nga buwitre, kab-uton an soberaniya ngan tukuron an nasud nga talwas ngan mauswag.