Padayon nga gintatarget han militar ngan pulis an mga parag-uma ha isla han Panay ngan Negros ha naglabay nga mga semana agud hadlukon an mga komunidad ngan magsabrag hin terorismo.

Ha Negros Occidental, ginpatay han militar an babaye nga parag-uma nga hi Joan Escuadro hadton Nobyembre 3 han gab-i. Ginsulod han mga ahente militar an iya balay ngan duok hiya nga ginpusil.

Ha Bago City, padayon an pan-gigipit han pulis han Negros Occidental District Jail-Male Dormitory ha mga priso pulitikal ngan lider nga inato ha pangabuso han napatalsik kundi nakabalik ha poder nga hi warden Maj. Crisysrel Awe. Arbitraryo nga ginbartolina hi Lorenzo Perolino tikang Oktubre 26 han kulop.

Ha Iloilo City, gin-aresto han mga pulis an 67 anyos nga hi “Mayok” ha Barangay Buntatala, Jaro hadton Nobyembre 3. Ginsalawdan hiya hin luun-luon nga kaso nga kriminal ngan gin-aakusahan nga hitaas nga upisyal han rebolusyunaryo nga kagiusan. Mayda hiya patong ha ulo nga ₱2.55 kamilyon.

Samtang, gin-aresto han mga pulis ngan militar an organisador han parag-uma ngan nasyunal nga minoriya nga hi Marlene Espiritu samtang nabiyahe ha Mabalacat City, Pampanga hadton Nobyembre 1. Gin-akusahan hiya nga hitaas nga upisyal han BHB ha Central Luzon ngan ginsalawdan hin lima nga kaso nga kriminal.

Ha Davao City, ginpatukan hin 30 kaadlaw nga suspensyon han Ombudsman hadton Oktubre 20 an kapitan han Barangay Bucana 76-A nga hi Robert Olanolan tungod ha iya pag-ato ha demolisyon ha Kabacan ngan Times Beach tikang pa Enero 2024. Naatubang hi Olanolan hin reklamo nga grave abuse nga iginsalawad han DMCI nga may plano magtukod hin negosyo ha lugar.