Duruyog nga nag-walkout an aada ha 5,500 nga estudyante tikang ha Benguet State University, Saint Louis University-Maryheights Campus ngan Main Campus, University of the Philippines-Baguio, ngan University of the Cordilleras, University of Baguio hadton Nobyembre 18. Kaparte an walkout han pagsalin-urog ha International Students’ Day hadton Nobyembre 17.

Naglansar han programa an mga kabatan-unan nga estudyante ha kada tagsa nga unibersidad, antes magmartsa tipakadto ha Malcolm Square para ha usa nga sentralisado nga programa. Ginkundenar han mga kabatan-unan an hiluagan nga korapsyon ha gubyerno ngan nagpapadayon nga kawaray baratunon ngan hustisya. Nanawagan liwat hira para ha dugang nga badyet ha edukasyon ngan ginkundenar an “mall-ification” o pribatisasyon han pampubliko nga merkado han Baguio ngan pagmimina han mga langyaw nga kompaniya ha kabukiran han Mankayan.

Labot ha walkout ha Baguio City, naglansar liwat hin makasaysayan nga walkout an 400 nga estudyante han University of Eastern Philippines ha Northern Samar hadton Nobyembre 17.

Ha Manila, gatus-gatos nga kabatan-unan, ha pangunguna han Youth Rage Against Corruption (YRAC), an nagmartsa ngadto ha Mendiola. Nagkamayda liwat hin mga aktibidad ngan protesta an mga kabatan-unan ha Tarlac, Pampanga, Laguna ngan Quezon, ha mga syudad han Cebu, Iloilo, Tacloban ngan Davao. Samtang, ginsukna han mga grupo an susrunod nga mga bomb threat ha mga unibersidad ngan eskoylahan ha pag-atentar nga idiskaril an ira mga protesta.

Ha Nobyembre 21, nakatalaan nga iglansar han mga grupo han kabatan-unan ngan estudyante an usa nga nasyunal nga adlaw han walkout ngan paggios. Nanindugan an mga estudyante nga padayon hira nga magios tubtub nga waray napapagbaton ngan diri napapatanggal ha pwesto hira Ferdinand Marcos Jr ngan Sara Duterte. Mapartisipar hira ha Baha sa Luneta 2.0 ha Nobyembre 30.