Samtang lumos ha baha an katawhan Pilipino, nalilibang an US ha pagpapapintas han interbensyon militar hini ha nasud. Kabakyang an niyutiyo hini nga Armed Forces of the Philippines (AFP), gin-gamit hini nga tahub an HADR (humanitarian assistance and disaster response) agud dirudiretso nga makaglansar han war games ngan iba pa nga panmilitar nga aktibidad.

Nagpapabilin an mga tropa nga Australian, usa nga mayor nga alyado han US ha Pacific, ha isla han Panay ha panahon han Bagyo nga Tino. Ginhuman nira an 1 kabulan nga war games nga Kasangga: 2025-02 hadton Nobyembre 7 ha Camp Peralta ha Jamindan, Capiz.

Ha panahon han Bagyo nga Uwan, linutaw an presensya han mga pwersa nga Amerikano ha Norte han Luzon diin ginlalansar liwat an 10 kaadlaw nga Joint Exercise (AJEX) Dagat, Langit at Lupa (DAGITPA) han AFP. Diri butaray nga napartisipar an US hini nga pagpapahiara.

Sugadpaman, kaparte an pagpahiara ha ginpapasulong han US nga pangandam ngan pangayat han gerra ha karibal hini nga imperyalista nga China. An hepe mismo han AFP an nagdeklara nga pangandam ini ingkaso “atakihon an Taiwan.” Napugos an AFP nga temporaryo nga ihunong an pagpahiara agud maglansar hin HADR, kaupod an mga tropa han US, ha pira nga parte ha Luzon.

Nagpapabilin liwat an mga bokis de gerra han US ha teritoryo pandagat han Pilipinas hini nga panahon. Hadton Nobyembre 14-15, iginlansar hini an ika-13 nga Multilaterial Maritime Cooperative Activity, kaupod an Japan, ngan ha syahan nga higayon, an Philippine Navy. Nakiggitgitay ini ha mga barko han Chinese hirani ha Scarborough Shoal.

Ha Alamada, North Cotabato, iginlansar an usa nga wara igsapubliko nga pagpahiara militar hadton Nobyembre 11-14. Hini nga mga adlaw, gin-antos han mga residente an magkulop nga waray hunong nga pagpapabuto han magkalain-lain nga klase han armas. Iginreport nira an presensya han mga langyaw nga tropa nga nagseserbe nga mga ins-truktor ha pagpapahiara han mga pankombat nga maniobra ha ira mga umhanan ngan sityo.