Ginbabay-og han grabe nga pampulitika nga krisis an rehimen Marcos. Kasunod ini han pagbuksas han hadto anay niya alyado ngan suruguon ha kongreso nga hi Marcos mismo an aada ha pungkay han dako nga burukrata kapitalista nga sindikato ha gubyerno nga nakolekta han kikbak ngan suhol ha gatus-gatos kabilyon nga piso nga mga proyekto nga imprastruktura. Waray igkatigda han katawhan ini nga pambubuksas, kundi mas ginsung-an an ira naglalarab nga kangalas ha engrande nga iskema han korapsyon ngan pangawat ni Marcos ha kwarta han katawhan.

Tungod kay hiya an gin-gipit ngan ginlaglag ni Marcos, nagyakan hi hadto anay kongresman Zaldy Co nga hi Marcos mismo an nagmando ha iya, komo pinuno han komite ha badyet ha kongreso, nga maglusot hin ₱100-kabilyon nga proyekto ha badyet han 2025. Iginbuksas niya nga hiya mismo an nagdara han marumaleta nga kikbak ha balay ni Marcos ngan ha Malacañang.

Natupo ngan kapareho ini han nahiuna nga testimoniya ha senado ni Roberto Bernardo, hadto anay hitaas nga upisyal han Department of Public Works and Highways (DPWH) nga bilyun-bilyon kapiso nga kikbak ha mga proyekto nga pan-imprastruktura an gindeliber niya ha mga yawe nga upisyal han Malacañang.

Ginsakyan han mga lider han Iglesia ni Cristo an hiluag nga kagiusan protesta kontra ha korapsyon. Ginhakot ha Luneta an mga membro hini agud magparayaw ngan pahimatnungan hi Marcos nga diri gipiton an mga negosyo hini nga nabuksas nga kasosyo han mga Discaya ha mag-anomaliya nga proyekto. Sinakay liwat an mga Duterte ngan iba nga nakakaalyado hini nga grupo nga kontra-Marcos para manguna ha rali ha pag-atentar nga magsulsol ha mga upisyal militar nga talikuran hi Marcos.

Ha desperado nga pag-atentar nga lim-pyuhon an lagayon nga nawong ni Marcos, ginpapagawas yana nga waray hiya kahibaruan ha bilyun-bilyon kapiso nga kikbak nga gindadara ha palasyo, ngan nga gin-gamit la an iya ngaran han mga suok niya nga upisyal. Ha kalisang, tigda nga gintanggal an pinakahigtaas nga upisyal han gabinete, sekretaryo ha badyet ngan pira nga yawe nga upisyal, butang nga nagdudugang ngan nagpapahilarum ha mga butak ha barkadahan nga Marcos.

Nalilisang yana an Malacañang nga itago an bukid han kwarta nga ginkurakot ni Marcos ha pondo han katawhan. Kabakyang niya an pira nga grupo sugad han Akbayan nga napostura nga kontra-korapsyon kundi nagtataming ha iya pinaagi han pagkwestyon ha pagbuksas nga hiya mismo dabi ngan aada ha pungkay han pangungurakot. Gin-gagamit nira nga panhadlok an posibilidad nga sumaliwan an pareho nga maraut nga hi Sara Duterte agud ulangon an panawagan han katawhan nga tapuson an rehimen US-Marcos.

Nagkikita an imperyalista nga amo ni Marcos. Pinaagi han kontrol hini ha AFP, padayon nga nagpapabilin nga bug-os an suporta han US kan Marcos. Dara hini an linya nga iskema han China an “destablisasyon” kontra kan Marcos. Sugadpaman, nakaandam ini nga igbalhin an suporta ha iba nga paksyon nga padayon nga mag-uundong ha interes ha ekonomiya, pulitika ngan militar han US ha nasud. Mahugot ini nga nakasumpay ngan nahatag hin pondo ha grupo nga Akbayan komo reserba nga kabayo hini, bisan pa nagpapabilin nga opsyon nga palingkuron an paksyon nga mas militarista, labina agud direkta nga puypuyon an natikakusog nga progresibo ngan patriyotiko nga kagiusan masa.

Diri nahunong an agos han mga protesta nga kontra-korapsyon. Padayon an mga walkout ngan gios protesta han mga kabatan-unan nga estudyante ha magkalain-lain nga parte han nasud. Nabutho an hiluag nga paggios han mga trabahador, mga kablas nga komunidad, ngan han magkalain-lain nga demokratiko nga klase ngan sektor. Pasista nga kamadarahug ngan panhadlok an igintatapo han rehimen Marcos para pamingawon an natikakusog nga tingog han katawhan.

Ha Nobyembre 30, adlaw han paghandum kan Andres Bonifacio, bayani han Pilipino nga anakbalhas, ginlalauman an utro nga pagbaha han katawhan ha Luneta ngan magkalain-lain nga dapit han nasud para igpakita an kangalas ha korapsyon. Subay ha panawagan nga papagbatunon an ngatanan nga dabi ha korapsyon, mas natikakusog an guliat han katawhan agud patalsikon o papagbul-iwon hi Marcos ngan Duterte.

Nagsasamwak yana an panawagan para tukuron an usa nga “transition council” o konseho nga pantransisyon, nga magdudumara ha estado ngan mag-aandam han proseso ha pagtukod han bag-o nga gubyerno. Espiho ini han hilarum nga pagkadismaya kawaray pagtapod han hiluag nga katawhan ha mga ligal nga proseso han naghahadi nga estado ngan ha mga gin-eleher nga upisyal han gubyerno. Samtang natikaiha an krisis han naghahadi nga sistema ilarum ni Marcos, piho magkukusog an konsensus para hini han magkalain-lain nga saray han katilingban Pilipino.

Ig-aanak ngan mahihitsura ini nga potensyal nga konseho han proseso han pagpapatalsik ha rehimen US-Marcos. Kun makab-ot, magigin bag-o nga natad ini han pakigbisog para ha ginhihingyap nga mga pagbabag-o. Kinahanglan ig-insister han katawhan an demokratiko nga pagrepresentar kontra ha dominasyon hini han mga naghahadi nga klase. An kusog han demokratiko nga mga sektor nga ginpupundar ha kagiusan nga kontra-korapsyon ngan burukrata kapitalismo, magigin puhunan ha mga pakigbisog ha tidaraon.

Importante gud, kun sugad, nga pakusgon han katawhan Pilipino an ira organisado nga ranggo ngan an hiluag nga kagiusan protesta agud patalsikon hira Marcos ngan Duterte. Krusyal an pira kabeses pa nga pagrayhak ngan paghiluag han pagpartisipar han masa nga trabahador, kablas ha syudad ngan parag-uma ha kabaryuhan, nga amo an nahiaagum han pinakagrabe nga hampak han korapsyon. Ini an piho nga magbabay-og ha paghahadi ni Marcos. Dako an ayat ha mga estudyante nga kumadto ha mga pabrika, komunidad ngan kabaryuhan, agud bumulig ha pagpukaw ngan pagpapagios ha milyun-milyon nga katawhan.

Pahitas-on an kapukawan han katawhan hiunong ha makaklase nga pag-analisar ha bagakolonyal ngan bagapyudal nga pankatilingban nga sistema ha Pilipinas. Kinahanglan pahilarumon an pankasaysayan nga kahibaruan hiunong ha pag-ato han katawhan ha dunot nga reaksyunaryo nga estado, ngan panginahanglan para ha rebolusyunaryo nga pakigbisog para hul-os nga bag-uhon an sistema.

Maupay gud an sitwasyon para ha Partido ngan mga rebolusyunaryo nga pwersa. Kinahanglan hakbuton an higayon agud pakusgon an Partido ngan an kabakyang hini nga mga sikreto nga organisasyon masa, agud magserbe nga puthaw nga rubas ngan makusog nga balayan ha panmaihaan nga pakigbisog. Kinahanglan pakusgon an panawagan nga kumadto ha kabaryuhan agud didto padayon nga igpundar an organisado ngan armado nga kusog han katawhan, ngan igtanum an liso han gubyerno han katawhan ngan han talwas ngan demokratiko nga kaayusan.