Dayag na nga iginpapanawagan han Bagong Alyansang Makabayan (Bayan) an pagbul-iw ha poder ni Presidente Ferdinand Marcos Jr ngan Bise Presidente Sara Duterte tungod ha pagkakadabi nira ha hiluagan nga korapsyon ha gubyerno. Pag-insister han alyansa, komo hadi ngan reyna han korapsyon, kinahanglan hira tanggalon ha pwesto ngan prisuhon ha pagdambong ha pondo han katawhan.

Dismayado an katawhan Pilipino tungod kay pira kabulan na an nakalabay tikang han magtikang an mga “imbestigasyon” waray pa gihapon napapagbaton ngan napipriso. Nagtuturudlukay an mga dabi ha anomaliya ngan gin-gagamit an mismo mga ahensya ngan komisyon han gubyerno para ha hiluagan nga cover-up. Waray tinuod nga pagpapabaton ngan hustisya nga nakakab-ot samtang aada ha poder hira Marcos ngan Duterte.

Iginduduso han Bayan an pagtukod han usa nga “transition council” nga masaliwan ha pagdumara ha gubyerno ngan mag-uundong ha interes han katawhan Pilipino kun mapatanggal an mga puno nga kawatan. Bubug-uson an konseho han mga indibidwal ngan grupo nga nagtataglawas ha demokratiko nga mga sektor nga nanguna ha kagiusan kontra korapsyon ngan kagiusan nga magpapatanggal ha mga Marcos ngan Duterte.

An mga pasabog ni Zaldy Co

Dinugang ha kangalas han katawhan an pasabog ni hadto anay Rep. Zaldy Co nga direkta nga nagtutdo kan Marcos komo upisyal nga may pinakadako nga “insertion” ha badyet para ha 2025. Sering niya, ginsugo hiya ni Marcos nga maglusot hin ₱100 kabilyon nga iginsaad ha iya han patod ni Marcos nga hi Martin Romualdez.

Nagpagawas liwat hi Co han listahan han mga proyekto diin nahingadto an ₱100 kabilyon nga pondo nga iginpalusot ni Marcos. Ini nga ₱81 kabilyon nakalista para ha imprastruktura, diin 80% mga proyekto nga flood control. Sering niya, nakuha hi Marcos hin 25% kikbak hini nga mga proyekto. Usa hi Co ngan mga kompaniya han iya pamilya ha nakahakin han gatus-gatos nga kontrata ha flood control ngan iba nga imprastruktura.

Kahuman an pasabog ni Co, gintanggal ni Marcos an iya Executive Secretary nga hi Lucas Bersamin ngan apo niya nga hi Adrian Bersamin, sugad liwat an sekretaryo ha badyet nga hi Amenah Pangandaman ngan partner niya nga undersecretary han edukasyon nga hi Trygve Olaivar. An upat an gintutdo ni Co nga opereytor ni Marcos ha paghakin han bilyun-bilyon nga kikbak.

Natikahiluag nga panawagan para ha baratunon

Dirudiretso an dagko ngan gudti nga paggios nga iginlalansar ha Metro Manila ngan mga prubinsya para manawagan han baratunon. Damo ha mga aktibidad ginpamunuan han mga organisasyon nga kaparte han Kilusang Bayan Kontra Kurakot (KBKK).

Gatus-gatos nga katawhan han National Capital Region (NCR), prinsipal tikang ha ranggo han mga trabahador ngan kablas ha syudad, an nakig-usa ha Lakbayan ng Mamamayan Kontra Korapsyon hadton Nobyembre 7. Nagmartsa hira ngadto ha Mendiola. Hito liwat nga adlaw, ginkadto ngan ginprotestahan han KBKK an Office of the Ombudsman ha Quezon City. Nagprotesta an mga trabahador pankalibsugan ha magkalain-lain nga ospital ngan an mga magturutdo tikang ha 212 nga eskoylahan ha NCR. Ginios liwat an mga trabahador ngan unyon ha Laguna.

Hadton Nobyembre 14, usa nga martsa an utro gna ginlansar ngadto ha Mendiola. Hito nga adlaw, nagkamayda liwat han mga paggios ha pito nga syudad ha Metro Manila; ha Pampanga, Cavite, Laguna ngan ha syudad han Iloilo, Cebu ngan Davao. Iginhimo liwat han mga trabahador, migrante ngan estudyante ha STEM (Science, Tech-nology, Engineering and Mathematics) an koordinado nga paggios hito nga adlaw. Naglansar naman han mga “protesta nga humaw-as” an mga trabahador ha kada tagsa nira nga lugar nga gintatrabahuan.

Hadton Nobyembre 16, sumobra-kumulang 3,000 nga indibidwal an pinartisipar ha ikaduha nga dalagan kontra ha korapsyon ha UP Diliman. Usa nga konsyerto kontra anomaliya an iginlansar ha Angeles City ha Pampanga hito nga adlaw. Ha susrunod nga adlaw tikang Nobyembre 17, naglansar an mga grupo han parupangisda hin protesta ha baybayon han Manila Bay.

Hadton Nobyembre 17 ngan 18, utro nga ginios an mga kabatan-unan ha bug-os nga nasud ha pangunguna han Youth Rage Against Corruption. Samtang hadton Nobyembre 20, nagprotesta an grupo han kababayin-an ha Quezon City.