Kada duha kasemana, nagtitirirok an mga membro han Committee to Support the Revolution in the Philippines (CSRP), alyado han Friends of the Filipino People in Struggle (FFPS) ha France, agud talakayon an isyu han Ang Bayan (AB). Kaparte ini han regular nga programa han CSRP agud adman ngan igpasamwak an mga nakab-ot ngan pagpasulong han gerra han katawhan ha Pilipinas.

Sigon ha Balita from FFPS, panmasa nga mantalaan han grupo, nagin kahiaraan na han CSRP an magpili han importante nga artikulo ha AB ngan pagtutudlok ha mga magtatalakay hini. Parte han pangangandam para ha pag-aram an paghuhubad han mga napili nga artikulo ha lenggwahe nga French.

“Mayda magkalain-lain nga pamaagi an mga kasama agud mag-andam ha pag-aram ha usa nga artikulo,” pahayag ni Ka Isaak han CSRP. Sering niya, hadton una nahatag-atensyon la an mga membro ha simple nga paghuhubad ha artikulo kundi ha dayuday mas nagin komportable na hira ngan nakakapaghatag na han kadugangan nga mga konteksto ngan impormasyon.

“Pananglitan, nagpapakita hira han mapa agud tudlukon an lokasyon han pira nga mga syudad ngan prubinsya, naghahatag han dugang nga detalye ha kinabuhi han usa nga martir, o igpapaliwanag an kasaysayan han usa nga organisasyon,” sigon kan Ka Isaak.

Nakit-an han CSRP an positibo nga epekto han ira regular nga diskusyon. Hinitaas an kompyansa han mga membro nira nga talakayon ha publiko an rebolusyon Pilipino ngan dugang hira nga naaaghat nga magpartisipar ha buruhaton ha internasyunal nga magbinurugto.

“An AB lahos pa ha usa nga instrumento han pagpupukaw. An pira ha mga nagpartisipar ha diskusyon inapi na ha CSRP, ngan yana napartisipar na ha amon mga mobilisasyon,” sigon kan Ka Isaak. Nagmamalaypakay na hira han mga bandera han FFPS ngan han National Democratic Front of the Philippines ngan nagpahayag han kaandaman nga suportahan an rebolusyon Pilipino, sering niya.