Aggigiddan a nag-walkout ti 5,500 estudyante manipud iti Benguet State University, Saint Louis University- Maryheights Campus ken Main Campus, University of the Philippines-Baguio, University of the Cordilleras ken University of Baguio idi Nobyembre 18. Ti walkout ket paset ti pananglagip iti International Students’ Day idi Nobyembre 17.

Dagiti kabataan-estudyante ket nagisayangkat ti programa kadagiti unibersidad da, kalpasan na ket nagmartsa da agturong idiay Malcolm Square para iti maysa a sentralisado a programa. Kinundenar dagiti kabataan ti nasaknap a korapsyon iti gubyerno ken agtultuloy a kinaawan ti sungsungbatan ken hustisya. Immawag da met ti nayon a badyet iti edukasyon ken kinundenar da ti “mallification” wenno pribatisasyon ti pangpubliko a palengke ti Baguio ken panagminas dagiti gangannaet a kumpanya iti kabambantayan ti Mankayan.

Malaksid iti walkout idiay Baguio City, nagisayangkat met ti istorikal a walkout ti 400 estudyante ti University of Eastern Philippines idiay Northern Samar idi Nobyembre 17.

Idiay Manila, ginasut a kabataan, iti panangiyuna ti Youth Rage Against Corruption (YRAC), ti nagmartsa agturong idiay Mendiola. Adda met ti aktibidad ken protesta dagiti kabataan idiay Tarlac, Pampanga, Laguna ken Quezon, kadagiti syudad ti Cebu, Iloilo, Tacloban ken Davao. Kabayatanna, binabalaw dagiti grupo ti agsasaruno a bomb threat kadagiti unibersidad ken eskwelahan iti gandat nga idiskaril dagiti protesta da.

Iti Nobyembre 21, naituding nga isayangkat dagiti grupo ti kabataan ken estudyante ti maysa a nailyan nga aldaw ti walkout ken tignay. Timmakder dagiti estudyante nga agtultuloy da nga agtignay agingga nga awan ti mapagsungbat ken saan a maikkat iti pwesto da Ferdinand Marcos Jr ken Sara Duterte. Makipaset da iti Baha sa Luneta 2.0 inton Nobyembre 30.