Dululungan nga nag-walkout ang mga 5,500 ka estudyante halin sa Benguet State University, Saint Louis University- Maryheights Campus kag Main Campus, University of the Philippines-Baguio, kag University of the Cordilleras, University of Baguio sadtong Nobyembre 18. Ang walkout kabahin sa pagdumdom sa International Students’ Day sadtong Nobyembre 17.

Naglunsar sang programa ang mga pamatan-on estudyante sa ila matag-unibersidad, amo ang pagmartsa padulong sa Malcolm Square para sa isa ka sentralisado nga programa. Ginkundenar sang mga pamatan-on ang lapnagon nga korapsyon sa gobyerno kag ang nagapadayon nga kawad-on sang salabton kag hustisya. Nagapanawagan man sila para sa dugang nga badyet sa edukasyon kag ginkundenar ang “mallification” ukon pribatisasyon sang pangpubliko nga merkado sang Baguio kag ang pagmina sang mga dumuluong nga mga kumpaniya sa kabukiran sang Mankayan.

Magluwas sa walkout sa Baguio City, naglunsar man sang makasaysayan nga walkout ang 400 ka estudyante sang University of Eastern Philippines sa Northern Samar sadtong Nobyembre 17.

Sa Manila, ginatos ka pamatan-on, sa pagpanguna sang Youth Rage Against Corruption, ang nagmartsa padulong sa Mendiola. May aktibidad man kag protesta ang mga pamatan-on sa Tarlac, Pampanga, Laguna kag Quezon, sa mga syudad sang Cebu, Iloilo, Tacloban kag Davao. Samtang, ginbatikos sang mga grupo ang sunod-sunod nga mga bomb threat sa mga unibersidad kag eskwelahan sa pagtilaw nga idiskaril ang ila mga protesta.

Sa Nobyembre 21, natalana nga ilunsar sang mga grupo sang pamatan-on kag estudyante ang isa ka pungsodnon nga adlaw sang walkout kag hublag. Nagapanindugan ang mga estudyante nga padayon sila nga mag-aksyon tubtob wala sang mapasabat kag indi mapahalin sa pwesto sanday Ferdinand Marcos Jr kag Sara Duterte. Magapakigbahin sila sa Baha sa Luneta 2.0 sa Nobyembre 30.