Dungan-dungan nga nag-walkout ang kapin 5,500 ka estudyante gikan sa Benguet State University, Saint Louis University-Maryheights Campus ug Main Campus, University of the Philippines-Baguio, University of the Cordilleras, ug University of Baguio niadtong Nobyembre 18. Kabahin kini sa pagdumdum sa International Students’ Day niadtong Nobyembre 17.

Naglunsad og programa ang mga kabatan-onang estudyante sa ilang tagsa-tagsa ka unibersidad, ayha nagmartsa paingon sa Malcolm Square alang sa usa ka sentralisadong programa. Gikundena sa mga kabatan-onan ang malukpanong korapsyon sa gubyerno ug ang padayon nga kawalay akawntabilidad ug hustisya. Nanawagan usab sila og dugang badyet sa edukasyon ug gimakmak ang “mallification” o pribatisasyon sa publikong merkado sa Baguio ug ang pagmina sa mga langyawng kumpanya sa kabukiran sa Mankayan.

Gawas sa walkout sa Baguio City, naglunsad usab og makasaysayanong walkout ang 400 ka estudyante sa University of Eastern Philippines sa Northern Samar niadtong Nobyembre 17.

Sa Maynila, gatusan ka mga kabatan-onan, sa pagpanguna sa Youth Rage Against Corruption (YRAC), ang nagmartsa paingon sa Mendiola. Aduna usay mga aktibidad ug protesta ang mga kabatan-onan sa Tarlac, Pampanga, Laguna, ug Quezon, sa mga syudad sa Cebu, Iloilo, Tacloban, ug Davao. Samtang, gimakmak sa mga grupo ang sunud-sunod nga mga bomb threat sa mga unibersidad ug eskwelahan sa pagsulay nga idiskaril ang ilang mga protesta.

Sa Nobyembre 21, gitakda sa mga grupo sa kabatan-onan ug estudyante ang paglunsad og nasudnong adlaw sa walkout ug protesta. Mibarog ang mga estudyante nga magpadayon sila sa pagprotesta hangtud walay napanubag ug dili mapahawa sa pwesto silang Ferdinand Marcos Jr ug Sara Duterte. Mosalmot sila sa Baha sa Luneta 2.0 karong Nobyembre 30.