Agtultuloy a nakaidasay iti riribuk ti Sudan manipud idi bimtak ti gubat iti baet ti Sudanese Armed Forces (SAF) ken Rapid Support Forces (RSF) idi 2023. Nasuroken 150,000 katao ti napatay iti gera, ken minilyon pay ti napilitan a pimmanaw.

Adda iti 25 milyon a Sudanese ti agsagsagaba ti napalalo a kinakurang iti taraon. Ti pagilyan ket maysa kadagiti agsagsagaba ti kakarwan a krisis iti panagbisin iti sangalubongan.

Segun iti International League of Peoples’ Struggle (ILPS), saan a simple a risiris dagiti lokal a pwersa ti mapaspasamak idiay Sudan. Makibibiang ditoy ti US tapno kontrolen saan laeng ti gubyerno ti Sudan nu di ket uray ti kinabaknang a mineral ti pagilyan.

Pagpalpalloten ti US ti RSF ken SAF babaen kadagiti alyado daytoy iti Middle East. Kabadang daytoy ti Mossad, ahensya a paniktik ti Zionista nga Israel, iti panangsanay iti RSF. Pagbetbettaken ti US ti risiris tapno pakapsuten ti panagkaykaysa dagiti pagilyan nga African ken Arab ken pagtalinaeden ti kontrol daytoy iti natural a kinabaknang ti rehiyon, nangruna ti balitok ken langis. Pinalubosan met ti US dagiti aso-aso na iti Middle East a makinabang iti linnakuan ti armas iti agsumbangir a benneg.

Makita ditoy a ti US ti kangrunaan nga addaan sungsungbatan iti krisis ken tukad- henosidyo a kinaranggas idiay Sudan, segun iti ILPS.

“Ti krisis iti Sudan ket repleksyon dagiti immuna nga imperyalista nga interbensyon iti Iraq, Libya ken Syria,” kuna daytoy. Daytoy ket kapada dagiti gubat a nairuswat iti nagan ti demokrasya ngem ti kinapudno ket para iti interes ti US ken dagiti alyado daytoy a pagilyan. Daytoy ket paset met ti nalawlawa a kampanya ti US ken dagiti alyado da tapno gudwaen ken kontrolen dagiti pagilyan iti Africa ken West Asia. Karaman ditoy dagiti gera iti Democratic Republic of the Congo ken ti panagraut iti Yemen ken Palestine, nga amin ket umat-atake iti karbengan dagiti umili iti bukod a pangngeddeng.