Padayong gigun-ob sa kagubot ang Sudan sukad miulbo ang gubat niadtong 2023 tali sa Sudanese Armed Forces (SAF) ug Rapid Support Forces (RSF). Kapin 150,000 na ka tawo ang namatay sa gubat, ug milyun-milyon pa ang napugos nga mopahawa.

Anaa sa 25 milyong Sudanese ang nag-antus sa grabeng kagutom. Giila ang nasud nga adunay usa sa labing grabeng krisis sa kagutom sa tibuok kalibutan.

Sumala sa International League of Peoples’ Struggle (ILPS), dili lang yanong panagbangi sa lokal nga mga pwersa ang nahitabo sa Sudan. Nanginlabot dinhi ang US aron kontrolon dili lang ang gubyerno sa Sudan apan bisan ang mga bahandi-mineral sa nasud.

Gipasabong sa US, pinaagi sa mga kaalyado niini sa Middle East, ang RSF ug SAF. Kaabag niini ang Mossad, ang ahensya sa paniktik sa Zionistang Israel, sa pagbansay sa RSF. Gipaulbo sa US ang panagbangi aron pahuyangon ang panaghiusa sa mga nasud sa Africa ug Arab ug aron mapadayon ang kontrol niini sa natural nga bahandi sa rehiyon, ilabina sa bulawan ug lana. Gitugutan usab sa US ang mga itoy niini sa Middle East nga makaganansya sa pagbaligya og armas sa nanagbanging pwersa.

Makita dinhi nga ang US mao ang nag-unang may tulubagon sa krisis ug sa ang-ang henosidyo nga kabangis sa Sudan, matud sa ILPS.

“Ang krisis sa Sudan salamin sa miaging mga interbensyon sa imperyalista sa Iraq, Libya, ug Syria,” matud pa niini. Pareho kini sa mga gubat nga gihimo sa ngalan sa demokrasya apan sa tinuod para sa interes sa US ug sa mga kaalyado niini. Kabahin usab kini sa mas lapad nga kampanya sa US ug sa mga kaalyado niini aron bahinon ug kontrolon ang mga nasud sa Africa ug West Asia. Lakip niini ang mga gubat sa Democratic Republic of the Congo ug ang pag-atake sa Yemen ug Palestine, nga tanan nag-atake sa katungod sa mga katawhan sa ilang kaugalingong paghukum.