Padayon nga nagakalubong sa kagamo ang Sudan sugod sang naglupok sadtong 2023 ang inaway sa tunga sang Sudanese Armed Forces (SAF) kag Rapid Support Forces (RSF). Masobra 150,000 na ka tawo ang napatay sa gyera, kag minilyon pa ang napilitan nga maglayas.

Yara sa 25 milyon ka Sudanese ang nagaantus sang grabe nga kakulang sa pagkaon. Ginakabig ang pungsod nga may isa sa pinakalala nga krisis sa gutom sa bug-os nga kalibutan.

Suno sa International League of Peoples’ Struggle (ILPS), indi simple nga banggaan sang lokal nga mga pwersa ang nagakahitabo sa Sudan. Nagapasilabot diri ang US sa katuyuan nga kontrolon indi lang ang gobyerno sang Sudan kundi bisan ang manggad-mineral sang pungsod.

Ginapasampok sang US, paagi sa mga alyado sini sa Middle East, ang RSF kag SAF. Kabulig sini ang Mossad, ahensya paniktik sang Zionistang Israel, sa paghanas sa RSF. Ginapadaba-daba sang US ang konplikto agud pahuyangon ang paghiliusa sang mga pungsod African kag Arab kag ipabilin ang kontrol sini sa dunang manggad sang rehiyon, ilabi na sa bulawan kag lana. Ginpasugtan man sang US ang mga papet sini sa Middle East nga magbenepisyo sa baligyaanay sang armas sa duha ka bahin.

Makita diri nga ang US ang nagapanguna nga may salabton sa krisis kag lebel-henosidyo sa kalakasan sa Sudan, suno sa ILPS.

“Ang krisis sa Sudan repleksyon sang mga nauna nga interbensyon imperyalista sa Iraq, Libya, kag Syria,” suno diri. Kaangay ini sa mga inaway nga ginapatigayon sa ngalan sang demokrasya apang sa pagkamatuod para sa interes sang US kag mga alyado sini nga pungsod. Kabahin man ini sang mga malapad nga kampanya sang US kag ila mga alyado agud tungaon kag kontrolon ang mga pungsod sa Africa kag West Asia. Kaupod diri ang mga gyera sa Democratic Republic of the Congo kag ang pagpangsalakay sa Yemen kag Palestine, nga tanan pag-atake sa kinamatarung sang mga pumuluyo sa kaugalingon nga pagbuot.