Tunggal dua a lawas, agtataripnong dagiti kameng ti Committee to Support the Revolution in the Philippines (CSRP), alyado ti Friends of the Filipino People in Struggle (FFPS) idiay France, tapno agtalantan ti isyu ti Ang Bayan (AB). Paset daytoy ti regular a programa ti CSRP tapno pagadalan ken pasaknapen dagiti nagun-od ken panagabante ti gubat ti umili iti Pilipinas.

Segun iti Balita from FFPS, pagiwarnak pangmasa ti grupo, nagbalinen a regular nga aktibidad ti CSRP ti agpili ti napapateg nga artikulo iti AB ken panangituding kadagiti mangtalantan ditoy. Ipatpatarus da dagiti napili nga artikulo iti pagsasao a French kas paset ti panagsagana para iti panagadal. Adda ti nadumaduma a pamuspusan dagiti kakadwa tapno agsagana iti panagadal iti maysa nga artikulo,” inpeksa ni Ka Isaak ti CSRP. Kunana, idi damo ket nakatutok laeng dagiti kameng iti simple a panangipatarus iti artikulo, ngem idi agangay a nagbalin dan a mas komportable ket makait-ited dan kadagiti nayon a konteksto ken impormasyon.

“Kaspangarigan, agipakpakita da ti mapa tapno itudo ti lokasyon ti sumagmamano a syudad ken prubinsya, mangit-ited da ti nayon a detalye iti biag ti maysa a martir wenno ipalpalawag da ti pakasaritaan ti maysa nga organisasyon,” segun ken Ka Isaak.

Nakita ti CSRP ti positibo nga epekto ti regular a panagtatalantan. Ngimmato ti kumpyansa dagiti kameng a talantanen iti publiko ti rebolusyon a Pilipino ken ad-adda a maguyguyugoy da a makipaset iti trabaho iti internasyunal a pannakikinnabsat.

“Ti AB ket labes pay iti instrumento ti panangriing. Ti dadduma kadagiti makipaspaset iti diskusyon ket nagkamengen iti CSRP, ken tatta ket dumardar-ay dan kadagiti mobilisasyon mi,” segun ken Ka Isaak. Agiwagwagayway dan ti bandera ti FFPS ken ti National Democratic Front of the Philippines ken nagiyebkas dan ti kinasagana a suportaran ti rebolusyon a Pilipino,” kunana.