Bayat a lumlumned iti layus ti umili a Pilipino, makumikom ti US iti panangpairteng ti interbensyon militar daytoy iti pagilyan. Iti pannakibinnadang ti aso-aso na nga Armed Forces of the Philippines (AFP), inaramat daytoy a kalub ti HADR (humanitarian assistance and disaster response) tapno tuluy-tuloy a makaisayangkat ti war games ken dadduma pay nga aktibidad militar.

Agtaltalinaed dagiti tropa nga Australian a maysa a mayor nga alyado ti US iti Pacific, iti isla ti Panay iti kangitingitan ti Bagyo Tino. Lineppas daytoy ti makabulan a war games a Kasangga: 2025-02 idi Nobyembre 7 iti Camp Peralta idiay Camindan, Capiz.

Iti Bagyo Uwan, nagparang ti presensya dagiti pwersa nga Amerikano iti Amyanan a Luzon nu sadinno a mairusruswat met ti 10-aldaw a a Joint Exercise (AJEX) Dagat, Langit at Lupa (DAGITPA) ti AFP. Saan a naparang a nakipaset ti US ditoy a panagsanay. Nupay kasta, daytoy a panagsanay ket paset ti itantandudo ti US a panagsagana ken panangkarit iti gera iti karibal daytoy nga imperyalista a China. Mismo a ti hepe ti AFP ti nagdeklara a daytoy ket panagsagana “amangan nu rauten (ti China) ti Taiwan.” Napilitan ti AFP nga isardeng pay ti panagsanay tapno agiyaramid ti HADR, kadwa dagiti tropa ti US, iti sumagmamano a paset iti Luzon.

Nagtalinaed met dagiti barko a panggubat ti US iti teritoryo a pangbaybay ti Pilipinas iti daytoy a panawen. Idi Nobyembre 14-15,inruswat daytoy ti maika-13 a Multilateral Maritime Cooperative Activity, kabilang ti Japan ken ti Philippine Navy iti umuna a gundaway. Nagmaniobra dagitoy laban kadagiti barko a Chinese asideg ti Scarborough Shoal.

Idiay Alamada, North Cotabato, naisayangkat ti maysa a saan a naipablaak iti publiko a panagsanay militar idi Nobyembre 11-14. Kadagitoy nga aldaw, inanusan dagiti residente ti agmalmalem nga awan sarday a panagpappaputok ti nadumaduma a klase ti armas. Inyulat da ti presensya dagiti gangannaet a tropa a nagserbi nga instruktor iti panagsanay kadagiti maniobra a kombat kadagiti taltalon ken sityo da.