Panangitabon ken Enrile iti Libingan ng mga Bayani, nasupyat. Pinullo nga organisasyon ken indibidwal ti nagipeksa ti panagsupyat da iti iskema a panangitabon ken Juan Ponce Enrile iti Libingan ng mga Bayani inton Nobyembre 22. Ni Enrile ket kagurgura nga arkitekto ti linteg militar, mammapatay-tao ken mannibrong iti kalikasan ken kaban ti pagilyan. Pimmusay isuna idi Nobyembre 13 iti edad a 101.

Protesta laban iti iligal a panagikkat iti Calabarzon. Nagprotesta dagiti mangmangged manipud iti Pamantik-KMU iti batog ti National Labor Relation Commission iti Calabarzon idi Nobyembre 17. Ingiddan da daytoy iti panagdengngeg ti ahensya kadagiti kaso ti iligal a panagikkat ti mangmangged iti Lazada, Shopee ken Coke.

Nagtuloy ti grupo iti upisina ti DPWH IV-A tapno kundenaren ti nasaknap a korapsyon kadagiti proyekto a pang-imprastraktura.

Silent protest dagiti manursuro ken empleyado iti CEU. Iti napalabas a lawlawas, nagikabit dagiti manursuro ken empleyado ti Centro Escolar University Faculty and Allied Workers Union iti kawkawes da kadagiti panawagan para iti disente a nayon sweldo, panangitandudo ti collective bargaining agreement (CBA) ken dadduma pay a karbengan dagiti manursuro ken empleyado. Sungbat daytoy ti unyon iti panagkedked ti administrasyon nga isakad ti maysa a nabagas a CBA para iti 2025-2030.

Tignay laban iti COP30. Nagmartsa dagiti grupo nga anti-imperyalista manipud Kalaw Avenue agturong embahada ti US idiay Manila idi Nobyembre 15 kas pannakikaykaysa iti Global Day of Action for Climate Justice. Ti tignay ket paset ti internasyunal a kampanya laban iti 30th Conference of the Parties wenno COP30 a maang-angay idiay Belem, Brasil. Ti COP30 ket pulong dagiti pagilyan a nagkari nga agtignay iti sango ti climate change.