Lubos nga ginapanawagan sang Bagong Alyansang Makabayan (Bayan) ang pagpanaug sa poder ni Presidente Ferdinand Marcos Jr kag Bise Presidente Sara Duterte tungod sa pagka-imbolbar nila sa lapnagon nga korapsyon sa gobyerno. Giit sang alyansa, bilang hari kag reyna sang korapsyon, dapat sila kakason sa pwesto kag bilangguon sa pagkawkaw sa kaban sang banwa.

Dismasyado ang pumuluyong Pilipino tungod pila ka bulan na ang nagligad halin sang nagsugod ang mga “imbestigasyon” wala pa gihapon sang napasabat kag nabilanggo. Nagtudluanay ang mga imbolbado sa korapsyon kag ginagamit ang mismo mga ahensya kag komisyon sang gobyerno para sa malaparan nga cover-up. Wala sang matuod nga salabton kag hustisya ang maagum tubtob yara sa poder sanday Marcos kag Duterte.

Ginaduso sang Bayan ang pagtukod sang isa ka “transition council” nga magabulos sa pagdumala sa gobyerno kag magatib-ong sang interes sang pumuluyong Pilipino kon mapahalin ang mga pinuno nga mga korap. Bug-oson ang konseho sang mga indibidwal kag grupo nga nagatiglawas sa demokratikong mga sektor nga nanguna sa kahublagan kontra korapsyon kag kahublagan pagpahalin sa mga Marcos kag Duterte.

Ang mga palupok ni Zaldy Co

Nagdugang sa kaakig sang pumuluyo ang palupok ni anay Rep. Zaldy Co nga direkta nga nagatudlo kay Marcos bilang opisyal nga may pinakadako nga “insertion” sa badyet para sa 2025. Suno sa iya, nga ginsugo siya ni Marcos nga magsingit sang ₱100 bilyon nga ginpangako sang pakaisa ni Marcos nga si Martin Romualdez.

Nagpaguwa man si Co sang listahan sang mga proyekto kon diin nagkadto ang ₱100 bilyon nga pondo nga ginpasingit ni Marcos. Ang ₱81 bilyon sini nakalista para sa imprastruktura, kon diin 80% mga proyektong flood control. Suno sa iya, nagakuha si Marcos sang 25% kikbak sa mga proyekto nga ini. Isa si Co kag mga kumpaniya sang iya pamilya ang naka-monopolyo sang ginatos ka kontrata sang flood control kag iban pa nga imprastruktura.

Pagkatapos sang palupok ni Co, ginkakas ni Marcos ang iya Executive Secretary nga si Lucas Bersamin kag iya apo nga si Adrian Bersamin, subongman ang tiglikom sa badyet nga si Amenah Pangandaman kag partner niya nga undersecretary sang edukasyon nga si Trygve Olaivar. Ang apat ang ginatudlo ni Co nga opereytor ni Marcos sa pagmonopolyo sang binilyon nga kikbak.

Nagalapad nga panawagan para sa salabton

Tayuyon ang mga dalagko kag magagmay nga hublag nga ginalunsar sa Metro Manila kag mga probinsya para manawagan sang salabton. Madamo sa mga aktibidad ginpamunuan sang mga organisasyon nga kabahin sang Kilusang Bayan Kontra Kurakot (KBKK).

Ginatos ka pumuluyo sang National Capital Region (NCR), mayor halin sa kubay sang mga mamumugon kag imol sa syudad, ang nakig-isa sa Lakbayan ng Mamamayan Kontra Korapsyon sadtong Nobyembre 7. Nagmartsa sila padulong sa Mendiola. Sa adlaw man nga ini, ginlusob kag gin-uyog sang KBKK ang Office of the Ombudsman sa Quezon City. Nagprotesta ang mga mamumugon pang-ikaayong-lawas sa lain-lain nga ospital kag ang mga manunudlo halin sa 212 ka eskwelahan sa NCR. Nag-aksyon man ang mga mamumugon kag unyon sa Laguna.

Sadtong Nobyembre 14, isa ka martsa ang liwat ginlunsar sa Mendiola. Sa adlaw nga ini, may hublag man sa pito ka syudad sa Metro Manila; sa Pampanga, Cavite, Laguna kag sa syudad sang Iloilo, Cebu kag Davao. Ginpatigayon man sang mga mamumugon, migrante kag estudyante sa STEM (Science, Technology, Engineering and Mathematics) ang koordinado nga aksyon sa adlaw nga ini. Naglunsar man sang mga “protestang magbangon” ang mga mamumugon sa ila matag-lugar nga ginatrabahuan.

Sadtong Nobyembre 16, indi magnubo 3,000 ka indibidwal ang nagpakigbahin sa ikaduha nga dalagan batuk sa korapsyon sa UP Diliman.Isa ka konsyerto kontra korapsyon ang ginlunsar sa Angeles City sa Pampanga sa adlaw nga ini. Sa sunod-sunod nga adlaw halin Nobyembre 17, naglunsar ang mga grupo sang mangingisda sang protesta sa baybay sang Manila Bay.

Sadtong Nobyembre 17 kag 18, liwat nag-aksyon ang mga pamatan-on sa bug-os nga pungsod sa pagpanguna sang Youth Rage Against Corruption. Samtang sadtong Nobyembre 20, nagpagahod ang grupo sang kababaenhan sa Quezon City.