Paglubong kay Enrile sa Libingan ng mga Bayani, ginpamatukan. Puluan ka organisasyon kag indibidwal ang nagpahayag sang ila pagpamatuk sa padihot nga paglubong kay Juan Ponce Enrile sa Libingan ng mga Bayani sang Nobyembre 22. Si Enrile ang ginakangil-aran nga arkitekto sang layi militar, manugpatay tawo kag manugkawkaw sang kapalibutan kag kaban sang banwa. Napatay siya sadtong Nobyembre 13 sa edad nga 101.

Protesta batuk sa iligal nga kakasanay sa Calabarzon. Nagprotesta ang mga mamumugon halin sa Pamantik-KMU sa atubang sang National Labor Relation Commission sa Calabarzon sadtong Nobyembre 17. Gindungan nila ini sa pag-hearing sang ahensya sa mga kaso sang iligal nga kakasanay sa Lazada, Shopee, kag Coke.

Nagderetso ang grupo sa opisina sang DPWH IV-A agud kondenaron ang lapnagon nga korapsyon sa mga proyektong pang-imprastruktura.

Silent protest sang mga manunudlo kag mga empleyado sa CEU. Sang nagligad nga mga semana, nagsab-it ang mga manunudlo kag empleyado sang Centro Escolar University Faculty and Allied Workers Union sa ila mga bayo sang mga panawagan para sa desente nga dugang nga sweldo, pagsulong sang collective bargaining agreement (CBA) kag iban pa nga kinamatarung sang mga manunudlo kag empleyado. Sabat ini sang unyon sa pagpamalibad sang administrasyon nga sakdagon ang isa ka signipikante nga CBA para sa 2025-2030.

Aksyon batuk sa COP30. Nagmartsa ang mga grupong kontra-imperyalista halin sa Kalaw Avenue padulong sa embahada sang US sa Manila sadtong Nobyembre 15 bilang pakig-isa sa Global Day of Action for Climate Justice. Kabahin ang hublag sa internasyunal nga kampanya batuk sa 30th Conference of the Parties ukon COP30 nga ginahiwat sa Belem, Brasil. Ang COP30 pagsinapol sang mga pungsod nga nagpangako nga maghulag sa atubang sang climate change.