Samtang lumos sa baha ang pumuluyong Pilipino, masako ang US sa pagpasingki sang interbensyon militar sini sa pungsod. Kabulig ang ido-ido sini nga Armed Forces of the Philippines (AFP), gingamit sini nga tabon ang HADR (humanitarian assistance and disaster response) para tayuyon nga makalunsar sang war games kag iban pa nga aktibidad militar.

Nagapabilin ang mga tropang Australian, isa ka mayor nga alyado sang US sa Pacific, sa isla sang Panay sa kasagsagan sang Bagyong Tino. Gintapos sini ang 1 ka bulan nga war games nga Kasangga: 2025-02 sadtong Nobyembre 7 sa Camp Peralta sa Jamindan, Capiz.

Sa kasagsagan sang Bagyong Uwan, nagtuhaw ang presensya sang mga pwersang Amerikano sa Norte sang Luzon kon diin ginalunsar man ang 10-adlaw nga Joint Exercise (AJEX) Dagat, Langit at Lupa (DAGITPA) sang AFP. Indi hayagan nga kabahin ang US sa paghanas nga ini. Apang, kabahin ang paghanas sa ginasulong sang US nga paghanda kag paghangkat sang gyera sa karibal sini nga imperyalistang China. Mismo ang hepe sang AFP ang nagdeklarar nga paghanda ini kon “salakayon ang Taiwan.” Napilitan ang AFP nga temporaryo nga untaton ang paghanas para magpatigayon sang HADR, kaupod ang mga tropa sang US, sa pila ka bahin sang Luzon.

Nagapabilin man ang mga barko pang-gyera sang US sa teritoryo pang-dagat sang Pilipinas sa panahon nga ini. Sadtong Nobyembre 14-15, ginlunsar sini ang ika-13 nga Multilateral Maritime Cooperative Activity, kaupod ang Japan, kag sa una nga higayon, ang Philippine Navy. Nakig-gitgitanay ang mga ini sa mga barko nga Chinese malapit sa Scarborough Shoal.

Sa Alamada, North Cotabato, ginlunsar ang isa ka wala ginsapubliko nga paghanas militar sadtong Nobyembre 11-14. Sa mga adlaw nga ini, gin-antus sang mga residente ang isa ka adlaw nga wala-untat nga pagpalupok sang lain-lain nga klase sang armas. Gin-report nila ang presensya sang mga dumuluong nga tropa nga nagaserbe nga mga instruktor sa paghanas sang mga maniobra pang-kombat sa ila mga ulumhan kag sityo.