Kada duha ka semana, nagatililipon ang mga katapo sang Committee to Support the Revolution in the Philippines (CSRP), alyado sang Friends of the Filipino People in Struggle (FFPS) sa France, para talakayon ang mga isyu sang Ang Bayan (AB). Kabahin ini sang regular nga programa sang CSRP agud tun-an kag palapnagon ang mga naagum kag pagsulong sang inaway banwa sa Pilipinas.

Suno sa Balita from FPPS, pahayagan masa sang grupo, nangin kalakaran na sang CSRP ang magpili sang malahalon nga artikulo sa AB kag pagtalana sa mga magtalakay sini. Kabahin sang paghanda para sa pagtuon ang paglubad sang mga napili nga artikulo sa hambal nga French.

“May lain-lain nga pamaagi ang mga kaupod para maghanda sa pagtuon sa isa ka artikulo,” pahayag ni Ka Isaak sang CSRP. Suno sa iya, sadtong una nakatutok lang ang mga katapo sa simple nga paglubad sa artikulo apang sang ulihi mas nangin komportable na sila kag makahatag na sang dugang nga mga konteksto kag impormasyon.

“Halimbawa, nagapakita sila sang mapa agud tumuron ang lokasyon sang pila sa mga syudad kag probinsya, nagahatag sang dugang nga detalye sa kabuhi sang isa ka martir, ukon ginapaathag ang kasaysayan sang isa ka organisasyon,” suno kay Ka Isaak.

Nakita sang CSRP ang positibo nga epekto sang ila regular nga talakayan. Nagsaka ang kumpyansa sang mga katapo nila nga talakayon sa publiko ang rebolusyon Pilipino kag mas sila nga nagaka-engganyo nga makigbahin sa hilikuton internasyunal nga pang-solidaridad.

“Ang AB labaw pa sa isa ka instrumento sang pagpamuklat. Ang pila sa mga nagapakigbahin sa talakayan nagpatapo na sa CSRP, kag subong nagapakigbahin na sa amon mga mobilisasyon,” suno kay Ka Isaak. Nagawagayway na sila sang mga bandera sang FFPS kag sang National Democratic Front of the Philippines kag nagapahayag sang kahandaan nga suportahan ang rebolusyon Pilipino, siling niya.