Ginkundenar sang Karapatan-Cagayan Valley ang iligal nga pagdakop kay Stalin Valencia, isa ka organisador sang mangunguma. Gindakop sang gin-isa nga pwersa sang Philippine National Police (PNP) kag 5th ID si Valencia sadtong Nobyembre 15 sa San Mateo, Isabela. Nagaatubang siya sang sampaw-sampaw nga mga kaso nga kriminal,lakip ang paslaw nga pagpatay kag pagpangsunog sa Cagayan Valley.

Bug-os nga adlaw nga wala ginpatuhaw si Valencia, kag gindingutan nga makita ang iya pamilya kag ginpili nga abogado. Ginakahangaw-an nila nga ginpaidalum siya sa interogasyon kag sikolohikal nga pagpaantus.

Sa Negros, sunod-sunod ang nalista nga mga kaso sang paglapas sa tawhanon nga kinamatarung halin Oktobre 28 tubtob Nobyembre 4.

Pag-aresto. Gindakop sang mga soldado sang 94th IB ang tumandok nga si Anoy Pacheco samtang pakadto sa iya ulumhan sa Sityo Tigbao, Barangay Buenavista, Himamaylan City sadtong Nobyembre 4. Si Pacheco bata sang isa ka “Kalanyan” ukon lider tumandok sa ila lugar nga Tribu Magahat-Bukidnon.

Pagpang-abukay. Sadtong Oktobre 28, pilit nga ginsulod kag ginransak sang mga soldado ang balay sang mangunguma nga si Remy Villacanao. Sunod sini ginlusob kag ginpalibutan sang mga soldado ang balay ni Chona Martinez, asawa kag utod sang mga biktima sang pangpulitika nga pagpatay sang militar.

Sa Laguna, nagaatubang sang peligro sang demolisyon ang komunidad sang imol sa NIA Road Purok 7 sa Barangay Pooc, Sta. Rosa, Laguna. Ang demolisyon ginasiling nga magahawan sang dalan para sa road concreting project sang ahensya. Natalana nga patigayunon ini sugod Nobyembre 18.