Atubangan sa daghang hagit, nagpadayon ang upat ka pakigbisog sa mga mag-uuma alang sa ilang katungod sa yuta sa Isabela. Sukad 2019, naglunsad sila og mga kampuhan, bungkalan, dayalogo, petisyon, ug komprontasyon batok sa mga agalong yutaan ug mga ahensya sa gubyerno.

Sa sentral nga Isabela, duha ka komunidad sa mga mag-uuma ang nakigbisog alang sa ilang katungod sa homestead. Ang maong erya giilog para mahimong kabahin sa mas dakung agro-industrial zone nga gigamit sa dagkung poultry, bodega, plantasyon sa melon, tubo, ug uban pa.

Usa niini ang kapin sa 20 ka ektaryang homestead nga humayan, maisan, ug melonan nga ginabungkal sa 20 ka pamilya. Kapin sa 40 ka tuig nang kanhing tenante nga nahimong benepisyaryo sa repormang agraryo ang mga pamilya. Pinaagi sa hiniusang lihok, nabawi nila ang giilog nga umahan, napahunong ang pagbaligya sa yuta, ug napahunong ang pagkolekta og abang. Napahunong usab nila ang pagpanghasi ug pagbalay-balay sa mga pulis ug militar.

Sa laing lungsod, nakigbisog ang mga mag-uuma alang sa kapin 20 ektaryang homestead nga humayan, maisan, ug gulayan. Ginaugmad kini sa 17 ka pamilyang mag-uuma nga 50 ka tuig nang tenante sa maong dapit. Niadtong 2021, kalit lang mitungha ang paryente sa agalong yutaan nga nagdala og pekeng “reconstituted” nga titulo ug ginailog ang yuta. Sukad niadto, aktibo nang nakigbisog ang mga mag-uuma alang sa ilang katungod taliwala sa pagpanumpo ug paglapas sa tawhanong katungod.

Sa habagatang Isabela, padayon ang pagdepensa sa mga mag-uuma sa ilang katungod sa pagtikad sa duha ka erya. Nagpabilin ang mga mag-uuma nga giilugan og yuta ug disimuladong nagtikad para sa ilang pagkaon ug panginabuhian sa halos 70 ektaryang yuta nga giilog sa usa ka kumpanya sa mina. Sa laing lungsod, gibatukan sa mga mag-uuma ang pag-angkon sa 50 ektaryang yuta sa takuban sa National Greening Program sa gubyerno.

Yawe ang pulitikanhong pagtuon sa pagpataas sa militansya

Sa milabayng unum ka tuig, daku ang papel sa pulitikanhong pagtuon sa pagpataas sa militansya ug paglig-on sa determinasyon sa mga mag-uuma sa ilang pakigbisog. Nahimo kining epektibong sagang batok sa kabangis sa mga agalong yutaan ug sa mga pwersa sa AFP ug PNP.

Sa upat ka kampanya sa Isabela, gisiguro ang paghatag og mga pulitikanhong pagtuon sa lain-laing yugto sa lihok sa mga mag-uuma. Gipahaum nila ang mga diskusyon sa partikular nga kahimtang, direksyon sa sitwasyon, ug pagalunsarong hiniusang aktibidad.

Gitibuok ug gitun-an nila ang kampanyang papel mahitungod sa pagpangilog sa yuta nga ilang giatubang. Gitun-an ang legal nga kahimtang sa mga mag-uuma, ang kasaysayan sa yuta, ug ang ilang katungod dinhi. Gisumpay nila kini sa kinatibuk-ang pakigbisog sa hut-ong mag-uuma sa diskusyon mahitungod sa tinuod nga reporma sa yuta.

Dungan sa pagtukod sa mga kahugpungang mag-uuma, gihisgutan ang oryentasyon sa ilang organisasyon. Nakahimo usab sila og diskusyon mahitungod sa sobrang importasyon sa bugas, pagtukod og base militar sa US sa rehiyon ubos sa EDCA, ug uban pang isyung pangmasa matag moapil sila sa mga rali.

Pormal usab silang nagtuon sa Mubong Kurso sa Katinglingban ug Rebolusyong Pilipino ug Espesyal nga Kursong Masa. Sa pagpalalum sa rebolusyonaryong kahimatngon, gihisgutan nila ang rebolusyonaryong oryentasyon ug tahas sa Pambansang Katipunan ng mga Magbubukid. Sa pipila ka higayon, nagtuon usab sila og Ang Bayan.

Nahimong tataw usab ang pagtuon sa mga mag-uuma mahitungod sa kahimtang sa tawhanong ug pagbatok sa kampanyang pagpasurender sa mga pulis, militar, ug NTF-Elcac. Gigamit nila kini isip sagang batok sa walay hunong nga pag-atake sa ilang panaghiusa ug pagsulay nga idiskaril sa ilang pakigbisog sa yuta. Mibarog ang mga komunidad batok sa pagpanghadlok ug pagpanglingla sa mga traydor nga “kanhi rebelde.”

“Kinahanglang ipadayon ang [mga pagtuon] sa uban pang mga myembro nila ilabina nga nagkabangis ug nagkalisud ang ilang lokal nga pakigbisog sa yuta,” matud sa report sa mga organisador.