Dayag nang gipanawagan sa Bagong Alyansang Makabayan (Bayan) ang pagpahawa kang Presidente Ferdinand Marcos Jr ug Bise Presidente Sara Duterte sa poder tungod sa ilang kalambigitan sa lapad nga korapsyon sa gubyerno. Duso sa alyansa, isip Hari ug Reyna sa Korapsyon, kinahanglan silang tangtangon sa pwesto ug ipriso tungod sa pagpangawkaw sa kaban sa nasud.

Dismayado ang katawhang Pilipino tungod pipila ka bulan sukad nagsugod ang mga “imbestigasyon” apan wala gihapoy nanubag ug napriso. Nagtinudluay ang mga nalambigit sa anomalya ug ginagamit pa ang mga ahensya ug komisyon sa gubyerno para sa malukpanong cover-up. Walay tinuod nga pagpanubag ug hustisya ang makuha hangtud anaa sa poder sila Marcos ug Duterte.

Ginaduso sa Bayan ang pagtukod og usa ka “transition council” nga mopuli sa pagdumala sa gubyerno ug magdepensa sa interes sa katawhang Pilipino kung mapapahawa ang mga nag-unang korap. Pagalangkuban ang konseho sa mga indibidwal ug grupo nga nagrepresentar sa demokratikong mga sektor nga nanguna sa kalihukang kontra korapsyon ug sa kalihukang magpahawa kang Marcos ug Duterte.

Ang mga pasabog ni Zaldy Co

Dugang sa kasuko sa katawhan ang gibutyag ni kanhing Rep. Zaldy Co nga direktang nagpunting kang Marcos isip upisyal nga adunay pinakadakung “insertion” sa badyet alang sa 2025. Matud pa niya, gisugo siya ni Marcos nga isal-ot ang ₱100 bilyon nga gisaad kaniya sa iyang ig-agaw nga si Martin Romualdez.

Nagpagawas usab ni Co og listahan sa mga proyekto diin napadulong ang ₱100 bilyon nga gipasal-ot ni Marcos. Ang ₱81 bilyon niini nakalista alang sa imprastruktura, diin 80% mga proyektong flood control. Matud pa niya, nakakuha si Marcos og 25% kikbak sa maong mga proyekto. Si Co ug ang mga kumpanya sa iyang pamilya usa sa mihakop sa gatusan ka kontrata sa flood control ug ubang imprastruktura.

Human sa gibutyag ni Co, gitangtang ni Marcos ang iyang Executive Secretary nga si Lucas Bersamin ug apo niini nga si Adrian Bersamin, ingonman ang kalihim sa badyet nga si Amenah Pangandaman ug ang iyang kauban nga undersecretary sa edukasyon nga si Trygve Olaivar. Kining upat mao ang gitudlo ni Co nga mga opereytor ni Marcos sa pagkolekta sa binilyong kikbak.

Nagkalapad nga panawagan sa pagpanubag sa mga korap

Padayon ang dinagku ug ginagmayng mga protesta nga ginalusad sa Metro Manila ug sa mga prubinsya aron manawagan sa pagpanubag sa mga korap. Daghan niini gipangulohan sa mga organisasyong sakop sa Kilusang Bayan Kontra Kurakot (KBKK).

Gatusan ka katawhan sa National Capital Region (NCR), nag-una gikan sa han-ay sa mga mamumuo ug kabus sa kasyudaran, ang miapil sa Lakbayan ng Mamamayan Kontra Korapsyon niadtong Nobyembre 7. Nagmartsa sila paingon sa Mendiola. Niadtong adlawa usab, gidagsang ug giyugyog sa KBKK ang Office of the Ombudsman sa Quezon City. Nagprotesta ang mga mamumuong panglawas sa lain-laing ospital ug ang mga magtutudlo gikan sa 212 ka eskwelahan sa NCR. Nagprotesta usab ang mga mamumuo ug unyon sa Laguna.

Niadtong Nobyembre 14, usa ka martsa ang subling gilunsad padulong sa Mendiola. Niadtong adlawa, adunay mga protesta sa pito ka syudad sa Metro Manila; sa Pampanga, Cavite, Laguna, ug sa mga syudad sa Iloilo, Cebu, ug Davao. Gipahigayon usab sa mga mamumuo, migrante, ug estudyante sa STEM (Science, Technology, Engineering and Mathematics) ang koordinadong protesta niadtong adlawa. Naglunsad usab og mga “protestang umahon” ang mga mamumuo sa ilang tagsa-tagsang trabahoan.

Niadtong Nobyembre 16, kapinkun-kulang 3,000 ka indibidwal ang mitambong sa ikaduhang fun run batok sa korapsyon sa UP Diliman. Usa ka konsyerto kontra anomalya ang gilunsad sa Angeles City, Pampanga niadtong adlawa. Sa sunud-sunod nga mga adlaw sukad Nobyembre 17, nagprotesta ang mga grupo sa mangingisda sa baybayon sa Manila Bay.

Niadtong Nobyembre 17 ug 18, subling nagprotesta ang mga kabatan-onan sa tibuok nasud sa pagpanguna sa Youth Rage Against Corruption. Samtang niadtong Nobyembre 20, giyugyog sa grupo sa kababayen-an ang Quezon City.