Paglubong kang Enrile sa Libingan ng mga Bayani, gisupak. Napuluan ka mga organisasyon ug indibidwal ang nagpahayag sa ilang pagsupak sa plano nga ilubong si Juan Ponce Enrile sa Libingan ng mga Bayani karong Nobyembre 22. Si Enrile mao ang gikasilagang arkitekto sa balaod militar, mamamatay-tawo, ug tigpangawkaw sa kinaiyahan ug sa kaban sa nasud. Namatay siya niadtong Nobyembre 13 sa edad nga 101.

Protesta batok sa iligal nga pagpanangtang sa Calabarzon. Nagprotesta ang mga mamumuo gikan sa Pamantik-KMU atubangan sa National Labor Relations Commission sa Calabarzon niadtong Nobyembre 17. Giatol nila kini sa pagdungog sa ahensya sa mga kaso sa iligal nga pagpanangtang sa Lazada, Shopee, ug Coke.

Human niini, nidiretso ang grupo sa upisina sa DPWH IV-A aron makmakon ang malukpanong korapsyon sa mga proyektong pang-imprastraktura.

Hilum nga protesta sa mga magtutudlo ug empleyado sa CEU. Sa milabayng mga semana, nagsab-it ang mga magtutudlo ug empleyado sa Centro Escolar University Faculty and Allied Workers Union og mga panawagan sa ilang mga sinina alang sa disenteng dugang suhulan, pagduso sa collective bargaining agreement (CBA), ug uban pang katungod sa mga magtutudlo ug empleyado. Tubag kini sa unyon sa pagdumili sa administrasyon nga mugnaon ang makatarunganong CBA alang sa 2025-2030.

Protesta batok sa COP30. Nagmartsa ang mga grupong anti-imperyalista gikan sa Kalaw Avenue paingon sa embahada sa US sa Maynila niadtong Nobyembre 15 isip pakighiusa sa Global Day of Action for Climate Justice. Kabahin kini sa internasyunal nga kampanya batok sa 30th Conference of the Parties o COP30 nga gilunsad sa Belem, Brasil. Ang COP30 mao ang katiguman sa mga nasud nga nagsaad nga molihok batok sa climate change.