Samtang nalubog sa baha ang katawhang Pilipino, napuliki ang US sa pagpakusog sa interbensyong militar niini sa nasud. Kaabag ang itoy niing Armed Forces of the Philippines (AFP), gigamit niining takuban ang HADR (humanitarian assistance and disaster response) aron padayong makapahigayon og war games ug uban pang kalihukang militar.

Nagpabilin ang mga tropang Australian, usa ka mayor nga kaalyado sa US sa Pacific, sa isla sa Panay atol sa Bagyong Tino. Gitapos niini ang usa ka bulan nga war games nga Kasangga: 2025-02 niadtong Nobyembre 7 sa Camp Peralta sa Camindan, Capiz.

Atol sa Bagyong Uwan, mitunga ang presensya sa mga pwersang Amerikano sa Amihanang Luzon diin ginalunsad usab ang 10 ka adlaw nga Joint Exercise (AJEX) Dagat, Langit ug Lupa (DAGITPA) sa AFP. Dili dayag nga kalahok ang US sa maong pagbansay. Bisan pa man, kabahin kini sa gipangduso sa US nga pagpangandam ug pagpanghagit og gubat batok sa iyang karibal nga imperyalistang China. Mismong ang hepe sa AFP ang nagdeklara nga pagpangandam kini kung “atakehon ang Taiwan.” Napugos ang AFP nga temporaryong ihunong ang pagbansay aron maghimo og HADR, kauban ang mga tropang US, sa pipila ka bahin sa Luzon.

Nagpabilin usab ang mga barkong iggugubat sa US sa teritoryong kadagatan sa Pilipinas niining panahona. Niadtong Nobyembre 14-15, gilunsad niini ang ika-13 nga Multilateral Maritime Cooperative Activity, kauban ang Japan, ug sa unang higayon, ang Philippine Navy. Nakigdasdas kini sa mga barkong Chinese duul sa Scarborough Shoal.

Sa Alamada, North Cotabato, gilunsad ang usa ka wala ipahibalo nga pagbansay militar niadtong Nobyembre 11-14. Niining mga adlawa, giantus sa mga residente ang tibuok adlaw nga walay hunong nga pagpabuto og nagkalain-laing klase sa armas. Gi-report nila ang presensya sa mga langyawng tropa nga nagsilbing instruktor sa pagbansay sa maniobrang kombat sa ilang mga umahan ug sityo.