Gikundena sa Karapatan-Cagayan Valley ang iligal nga pagdakop kang Stalin Valencia, usa ka organisador sa mga mag-uuma. Gidakop siya sa hiniusang pwersa sa Philippine National Police (PNP) ug 5th ID niadtong Nobyembre 15 sa San Mateo, Isabela. Nag-atubang siyag patung-patong nga mga kasong kriminal lakip ang frustrated murder, murder, ug arson sa Cagayan Valley.

Tibuok gabii siyang gitago ug gihikawan nga makita sa iyang pamilya ug sa iyang gipiling abogado. Nahadlok sila nga gipailalum siya sa interogasyon ug sikolohikal nga tortyur.

Sa Negros, sunud-sunod ang nataho ang mga kaso sa paglapas sa tawhanong katungod gikan Oktubre 28 hangtud Nobyembre 4.

Pag-aresto. Gidakop sa mga sundalo sa 94th IB ang lumad nga si Anoy Pacheco samtang paingon sa iyang umahan sa Sityo Tigbao, Barangay Buenavista, Himamaylan City niadtong Nobyembre 4. Si Pacheco anak sa usa ka “Kalanyan” o lider sa Tribu Magahat-Bukidnon sa ilang lugar.

Pagpangutingkay. Niadtong Oktubre 28, pugos nga gisulod ug giransak sa mga sundalo ang balay sa mag-uuma nga si Remy Villacanao. Sunod niini, gisulong ug giliyukan sa mga sundalo ang balay ni Chona Martinez, asawa ug igsuon sa mga biktima sa pulitikanhong pagpatay sa militar.

Sa Laguna, nag-atubang og hulga sa demolisyon ang komunidad sa mga kabus sa NIA Road Purok 7, Barangay Pooc, Sta. Rosa, Laguna. Ang demolisyon giingonng mohatag dalan sa road concreting project sa ahensya. Gitakda kining sugdan sa Nobyembre 18.