Gitay-og sa grabeng pulitikanhong krisis ang rehimeng Marcos. Kini human sa pagbutyag sa kanhi niyang kaalyado ug suluguon sa kongreso nga si Marcos mismo mao ang anaa sa pungkay sa dakung burukrata kapitalistang sindikato sa gubyerno nga nagakolekta og kikbak ug suhol sa gatusan ka bilyong piso nga mga proyektong imprastruktura. Wala mahibulong ang katawhan niini nga pagbutyag, apan labaw niining gisugnuran ang ilang nagdilaab nga kasuko sa dinagkung laraw sa korapsyon ug pagpangawat ni Marcos sa pondo sa nasud.

Tungod kay siya ang gipig-ot ug gihulog ni Marcos, gibutyag ni kanhing kongresman Zaldy Co nga si Marcos mismo ang nagsugo niya, isip nangulo sa komite sa badyet sa kongreso, nga isal-ot ang ₱100-bilyon nga proyekto sa badyet sa 2025. Gibutyag niya nga siya mismo ang nagdalag mga male-maletang kikbak sa balay ni Marcos ug sa Malacañang.

Pareho kini sa miaging testimonya sa senado ni Roberto Bernardo, kanhi taas nga upisyal sa Department of Public Works and Highways (DPWH), nga binilyo ka pisong kikbak sa mga proyektong imprastruktura ang iyang gideliber sa mga yaweng upisyal sa Malacañang.

Gisakyan sa mga lider sa Iglesia ni Cristo ang lapad nga kalihukang protesta batok sa korapsyon. Gihakot nila ngadto sa Luneta ang ilang mga sakop aron magpakitag kusog ug pahimangnoan si Marcos nga dili pig-oton ang ilang mga negosyo nga nabutyag nga kasosyo sa mga Discaya sa mga proyektong puno sa anomalya. Misakay usab ang mga Duterte ug uban pang mga kaalyado niini nga mga paksyong anti-Marcos aron magpakana og rali sa pagsulay manghulhog sa mga upisyal militar nga talikdan si Marcos.

Sa desperadong pagsulay nga limpyuhan ang iyang nawong nga puno sa lapok, ginapagawas karon ni Marcos nga wala siyay hanaw sa binilyong kikbak nga gidala sa palasyo ug nga gigamit lamang ang iyang ngalan sa iyang mga suod nga upisyal. Sa kataranta, dali-dali niyang gitangtang ang labing taas nga mga upisyal sa gabinete, kalihim sa badyet, ug pipila ka yaweng upisyal, nga nakadugang ug nakapalalum sa mga siak sa iyang pundok.

Nagkayamukat karon ang Malacañang sa pagtago sa nagtipun-og nga kwartang gikurakot ni Marcos gikan sa pondo sa nasud. Kauban niya ang pipila ka grupo sama sa Akbayan nga nagpakaaron-ingnong kontra-korapsyon apan nanalipud kaniya pinaagi sa pagduhaduha sa pagbutyag nga siya mismo ang nalambigit ug anaa sa kinatumyan sa korapsyon. Gihimo nilang panghadlok ang posibilidad nga mopuli ang parehong korap nga si Sara Duterte aron pugngan ang panawagan sa katawhan nga tapuson ang rehimeng US-Marcos.

Nakatutok ang imperyalistang amo ni Marcos. Pinaagi sa kontrol niini sa AFP, tibuok pa gihapon ang suporta sa US kang Marcos. Gidala niini ang linya nga laraw sa China ang “destabilisasyon” batok kang Marcos. Bisan pa man, andam kini nga ibalhin ang suporta sa laing paksyon nga magpadayon sa pagpanalipud sa interes sa ekonomiya, pulitika, ug militar sa US sa nasud. Hugot kining nakalambigit ug naghatag og pondo sa grupong Akbayan isip reserbang kabayo, bisan og nagpabiling opsyon nga ituboy ang mas militaristang paksyon, ilabina aron direktang sumpuon ang nagkusog nga progresibo ug makinasudnong kalihukanng masa.

Wala mihunong ang pagdagayday sa mga protesta kontra korapsyon. Padayon ang mga walkout ug mga lihok protesta sa mga kabatan-onang estudyante sa lain-laing bahin sa nasud. Miulbo ang lapad nga protesta sa mga mamumuo, sa mga kabus nga komunidad, ug sa nagkalain-laing demokratikong hut-ong ug sektor. Pasistang kabangis ug pagpanghadlok ang gisugat sa rehimeng Marcos aron pahilumon ang nagkakusog nga tingog sa katawhan.

Sa Nobyembre 30, adlaw sa paghandum kang Andres Bonifacio, bayani sa masang Pilipino, gilauman ang pagbaha pag-usab sa katawhan sa Luneta ug sa lain-laing bahin sa nasud aron ipakita ang kasilag sa korapsyon. Subay sa panawagan nga papanubagon ang tanang nalambigit sa korapsyon, nagkakusog ang singgit sa katawhan nga palagputon o paluwaton si Marcos ug Duterte.

Mikaylap karon ang panawagan sa pagtukod og “transition council” o konsehong pang-transisyon nga magdumala sa estado ug mag-andam sa proseso sa pagtukod og bag-ong gubyerno. Kini salamin sa lalum nga pagkadismaya ug kawalay pagsalig sa lapad nga katawhan sa mga legal nga proseso sa nagharing estado ug sa mga napiling upisyal sa gubyerno. Samtang nagalungtad ang krisis sa nagharing sistema ubos ni Marcos, siguradong makusog pa ang panaghiusa dinhi sa nagkalain-laing bahin sa katilingbang Pilipino.

Ihimugso ug iporma ang maong konseho sa proseso sa pagpalagpot sa rehimeng US-Marcos. Kung makab-ot, mahimong bag-ong natad kini sa pakigbisog alang sa gitinguhang mga kausaban. Kinahanglan ipadayon sa katawhan ang demokratikong representasyon batok sa pagdominar dinhi sa mga nagharing hut-ong. Ang kusog sa demokratikong mga sektor nga gipundar sa kalihukan kontra korapsyon ug burukrata kapitalismo mao ang mahimong puhunan sa mga pakigbisog sa umaabot.

Busa, labing mahinungdanon nga palig-onon sa katawhang Pilipino ang ilang organisadong han-ay ug ang lapad nga kalihukang protesta aron palagputon sila Marcos ug Duterte. Mahinungdanon ang makanunayong pagpalagsik ug pagpalapad sa pagsalmot sa masang mamumuo, kabus sa kasyudaran, ug mag-uuma sa kabanikanhan, nga maoy labing naigo sa korapsyon. Kini ang siguradong motay-og sa paghari ni Marcos. Daku ang hagit sa mga estudyante nga moadto sa mga pabrika, komunidad, ug kabanikanhan aron motabang sa pagpukaw ug pagpalihok sa minilyong katawhan.

Ipataas ang kahimatngon sa katawhan mahitungod sa makihut-ong nga pagsusi sa semikolonyal ug semipyudal nga sistema sa katilingbang Pilipino. Kinahanglang palalumon ang kahibalo sa kasaysayan sa pakigbisog sa katawhan batok sa dunot nga reaksyunaryong estado, ug ang panginahanglan sa rebolusyonaryong pakigbisog aron hingpit nga bag-ohon ang sistema.

Daw pabor ang sitwasyon alang sa Partido ug mga rebolusyonaryong pwersa. Kinahanglang sakmiton ang higayon aron palig-onon ang Partido ug ang mga kaabag niining tago nga mga organisasyong masa, aron mahimong puthaw nga ubod ug lig-ong dugukan sa malungtarong pakigbisog. Kinahanglang palig-onon ang panawagan sa pag-adto sa kabanikanhan aron didto padayong ipundar ang organisado ug armadong kusog sa katawhan, ug itanum ang binhi sa gubyerno sa katawhan ug sa gawasnon ug demokratikong kaayusan.