Nanumpa ang mga bag-ong napiling lider sa Alyansa ng Manggagawang Bukid ng Asyenda Luisita (AMBALA) niadtong Nobyembre 16 sa usa ka tigum sa Barangay Lourdes, San Miguel, Tarlac City.

Gihimo kini atol sa paghandum sa masaker niadtong 2004 diin pito ka mag-uuma sa Hacienda Luisita ang napatay sa pagpamusil sa mga pwersa sa estado. Nagwelga kaniadto ang United Luisita Workers Union ug Central Azucarera de Tarlac Labor Union isip tubag sa iligal nga pagtangtang sa 326 ka unyonista. Tubag usab ang welga sa ulipon nga suhulan sa kumpanya nga niadtong panahona nga ₱9.50 ra kada adlaw.

Human sa tigum, nagmartsa ang mga mag-uuma sa mga kalsada sa Tarlac City. Gidala nila ang ilang mga panawagan alang sa katungod sa yuta, panginabuhian, ug puy-anan.

Napili ang bag-ong mga lider sa AMBALA sa ilang asembliya niadtong Nobyembre 15 nga giapilan sa mga myembro gikan sa nagkalain-laing barangay. Kadaghanan sa bag-ong mga lider mga babaye. Anaa na karon sa ilang mga abaga ang pagbawi sa kadaugan sa welgang bayan ug ang pagpalagsik ug pagpalig-on sa organisasyon.