Matag duha ka semana, nagtapok-tapok ang mga myembro sa Committee to Support the Revolution in the Philippines (CSRP), kaalyado sa Friends of the Filipino People in Struggle (FFPS) sa France, aron hisgutan ang mga isyu sa Ang Bayan (AB). Kabahin kini sa regular nga programa sa CSRP aron tun-an ug ipakaylap ang mga nakab-ot ug pag-uswag sa gubat sa katawhan sa Pilipinas.

Sumala sa Balita from FFPS, pangmasang mantalaan sa grupo, naandan na sa CSRP ang pagpili og importanteng mga artikulo sa AB ug pagtudlo og mga instruktor niini. Kabahin sa pagpangandam sa pagtuon mao ang paghubad sa mga napiling artikulo ngadto sa pinulongang French.

“Adunay lain-laing paagi ang mga kauban sa pag-andam sa pagtuon sa usa ka artikulo,” matud ni Ka Isaak sa CSRP. Sa sinugdanan, nakatutok lang ang mga myembro sa simpleng paghubad sa artikulo, apan sa kadugayan nahimong mas komportable na sila ug nakahatag na og dugang konteksto ug impormasyon.

“Pananglitan, magpakita sila og mapa aron matino ang lokasyon sa pipila ka syudad ug prubinsya, maghatag og dugang detalye sa kinabuhi sa usa ka martir, o magpasabot sa kasaysayan sa usa ka organisasyon,” matud pa ni Ka Isaak.

Nakita sa CSRP ang maayong epekto sa ilang regular nga diskusyon. Mitaas ang pagsalig sa ilang mga myembro sa paghisgot sa publiko mahitungod sa rebolusyong Pilipino ug labaw silang naaghat sa pag-apil sa mga kalihukan sa internasyunal nga pakigsuod.

“Ang AB labaw pa sa usa ka instrumento sa pagpukaw. Pipila sa mga nisalmot sa diskusyon nahimong sakop na sa CSRP, ug karon nagaapil na sa among mga mobilisasyon,” matud ni Ka Isaak. Nagwarawara na sila og bandera sa FFPS ug sa National Democratic Front of the Philippines ug nagpadayag nga andam silang suportahan ang rebolusyong Pilipino, matud pa niya.