Nagpahayag han pagtipa an mga residente han MacArthur, Leyte kontra ha pagmimina han blacksand han Mac-Arthur Ironsand Project Corporation (MIPC) ha ira bungto hini nga Pebrero. Nagpapaluyo ha operasyon an dinastiya nga Romualdez nga mayda kontrol liwat ha iba pa nga mapanhibang nga pagmimina ha Eastern Visayas.

An MIPC kontraktor han Strong Built Mining Development Corporation (SBMDC). Hadton 2007, gintagan han Mines and Geosciences Bureau-Region 8 an SBMDC han 25-katuig nga Mineral Production Sharing Agreement (MPSA) lupgop an 7,411 ektarya nga tuna ha mga bungto han Dulag, Mayorga, MacArthur, Javier ngan Abuyog. An SBMDC ginpalit hadton 2024 han Bright Kindle Resources & Investments Inc, kompaniya nga pananag-iya ni Martin Romualdez, patod ni Ferdinand Marcos Jr, hadto anay Speaker ngan kongresista han syahan nga distrito han Leyte.

Natipa an mga residente ha operasyon tungod kay hihibangon han pagmimina an mga tuna nga umhanan ngan mga sistema nga patubig nga importante ha produksyon han pagkaon. Mayda na liwat mga report nga gindidid-an an pira nga parag-uma nga makatukad ha kalugaringon nira nga tuna. Hadton 2022, naduso na han pagkakaurusa han mga residente an temporaryo nga pagpapaundang ha operasyon han MIPC-SBMDC.

Antes pa sumulod an MIPC-SBMDC ha MacArthur, nagmina na han blacksand an Nicua Mining Corporation ha bungto. Ginhilo han pagmimina an Lake Bito tungod kay natirok ha danaw an lana ngan iba pa nga kemikal tikang ha minahan. Pira kabeses liwat nga namatay an torutonelada nga isda ngan iba pa nga karikuhan ha danaw. Hadton 2012, nagbarikada an mga taga-Barangay Villa Imelda ngan Barangay Liwayway kontra ha operasyon.