Nagpahayag sang pagpamatuk ang mga residente sang MacArthur, Leyte batuk sa pagmina sang blacksand sang Mac-Arthur Ironsand Project Corporation (MIPC) sa ila nga banwa sining Pebrero. Yara sa likod sang operasyon ang dinastiyang Romualdez nga may kontrol man sa iban pa nga mapangwasak nga pagmina sa Eastern Visayas.

Ang MIPC kontraktor sang Strong Built Mining Development Corporation (SBMDC). Sadtong 2007, ginhatagan sang Mines and Geosciences Bureau-Region 8 ang SBMDC sang 25-tuig nga Mineral Production Sharing Agreement (MPSA) sakop ang 7,411 ektarya nga kadutaan sa mga banwa sang Dulag, Mayorga, MacArthur, Javier kag Abuyog. Ang SBMDC ginbakal sadtong 2024 sang Bright Kindle Resources & Investments Inc, kumpaniya nga ginapanag-iyahan ni Martin Romualdez, pakaisa ni Ferdinand Marcos Jr, anay speaker kag kongresista sang una nga distrito sang Leyte.

Nagapamatuk ang residente sa operasyon tungod gub-on sang pagmina ang mga dutang ulumhan kag mga sistema sang patubig nga kritikal sa produksyon sang pagkaon. May mga report na nga ginadumilian ang pila ka mangunguma nga makasulod sa kaugalingon nila nga duta. Sadtong 2022, naduso na sang paghiliusa sang mga residente ang temporaryo nga pagpauntat sa operasyon sang MIPC-SBMDC.

Antes pa magsulod ang MIPC-SBMDC sa MacArthur, nagamina na sang blacksand ang Nicua Mining Corporation sa banwa. Ginahiluan sang pagmina ang Lake Bito tungod nagatipon sa linaw ang lana kag iban pa nga kemikal halin sa minahan.Pila ka beses man nga napatay ang tonelada nga isda kag iban pa nga mga manggad sa tubig sa linaw. Sadtong 2012, nagbarikada ang mga taga-Barangay Villa Imelda kag Barangay Liwayway batuk sa operasyon.