Iginbuksas ni Rep. Antonio Tinio han ACT Teachers Partylist an pira nga detalye han korapsyon nga gindadabihan ni Ferdinand Marcos Jr kasumpay han maanomaliya nga mga proyekto ha flood control. Ha usa nga pamulong ha Kongreso hadton Pebrero 10, ginsering niya nga personal niya nga nakit-an an mga balyuay han mensahe giutan ni Marcos ngan Adrian Bersamin, hadto anay pinuno han Presidential Legislative Liaison Office, nga inakto nga “suruguon” ni Marcos ha mga transaksyon. Hi Bersamin apo ha umangkon ni hadto anay executive secretary ni Marcos nga hi Lucas Bersamin.

Nahitabo an balyuay han mensahe giutan han Disyembre 2024 tubtub Hulyo 2025, ha panahon nga iginmando ni Marcos an pagsingit han mga proyekto nga nabalor han ₱100 kabilyon ha badyet para ha 2025. Sentro han balyuay an pagdul-ong ni Bersamin han ₱8 kabilyon nga kikbak nga nahibaruan nga gin-gamit ni Marcos ha eleksyon 2025. Una na nga iginbuksas han hadto anay undersecretary han Department of Public Works and Highways nga hi Roberto Bernardo nga nagduhol hiya han ₱8 kabilyon kan Bersamin ngan hadto anay undersecretary ha edukasyon nga hi Trygve Olivar. Ha mga mensahe nga iginpakita kan Tinio, iginpahibaro ni Bersamin kan Marcos nga “kumpleto na” an pagdudul-ong han nasering nga balor hadton Marso 2025.

Hadton Hulyo 2025, pira kaadlaw antes an state of the nation address (SONA) ni Marcos kun diin ginsusnan niya an mga kongresista ha mga pulong nga “maawod naman kamo” kasumpay han mga proyekto nga flood control, kinarawat hi Marcos han dugang nga ₱2 kabilyon nga kikbak nga igindul-ong ni Bersamin ha ginpalit ni Marcos nga balay ha Forbes Park.

Ini nga impormasyon nagtikang kan Rep. Leandro Leviste nga syahan na nga iginbuksas nga mayda hiya katin nga mga bidyo ngan affidavit tikang ha mga Bersamin nga magpapamatuod ha mga panhitabo. Iginpasaro niya ini nga mga ebidensiya ha mga tinaglawas han Makabayan, Liberal Party ngan iba pa nga grupo.

Tungod ha pag-alang ni Leviste nga igsapubliko an nasering nga mga bidyo ngan mensahe, waray ini mahilakip ha impeachment complaint nga iginsalawad kontra kan Marcos. Iginbasura na an nasering nga reklamo hadton Pebrero 10, diin iginbuksas ni Tinio an mga ebidensya nga natirok ni Leviste.