Ginbuyagyag ni Rep. Antonio Tinio sang ACT Teachers Partylist ang pila ka detalye sang korapsyon nga imbolbado si Ferdinand Marcos Jr kaangot sa maanomaliya nga mga proyekto sa flood control. Sa isa ka pamulong-pulong sa Kongreso sadtong Pebrero 10, ginsiling niya nga personal niya nga nakita ang mga bayluhanay sang mensahe sa tunga ni Marcos kag Adrian Bersamin, anay pinuno sang Presidential Legislative Liaison Office, nga naga-akto bilang “sulugoon” ni Marcos sa mga transaksyon. Si Bersamin apo sa hinablos sang anay executive secretary ni Marcos nga si Lucas Bersamin.

Natabo ang bayluhanay sang mensahe sa tunga sang Disyembre 2024 tubtob Hulyo 2025, sa panahon nga ginmando ni Marcos ang pagsingit sang mga proyekto nga nagabalor sang ₱100 bilyon sa badyet para sa 2025. Sentral sa bayluhanay ang pagdul-ong ni Bersamin sang ₱8 bilyon nga kikbak nga nahibaluan nga gingamit ni Marcos sa eleksyon 2025. Una na nga ginbuyagyag sang anay undersecretary sang Department of Public Works and Highways nga si Roberto Bernardo nga nagdul-ong siya sang ₱8 bilyon kay Bersamin kag anay undersecretary sa edukasyon nga si Trygve Olivar.Sa mga mensahe nga ginpakita kay Tinio, ginpahibalo ni Bersamin kay Marcos nga “kumpleto na” ang pagdul-ong sang amo nga kwarta sadtong Marso 2025.

Sadtong Hulyo 2025, pila ka adlaw antes ang state of the nation address (SONA) ni Marcos kon diin ginkastigo niya ang mga kongresista sa mga tinaga nga “mahuya naman kamo” kaangot sa mga proyektong flood control, nagbaton si Marcos sang dugang nga ₱2 bilyon nga kikbak nga gindul-ong ni Bersamin sa ginbakal ni Marcos nga balay sa Forbes Park.

Ang impormasyon nga ini naghalin kay Rep. Leandro Leviste nga una na nga nagbuyagyag nga may ginauyatan siya nga bidyo kag affidavit halin sa mga Bersamin nga magapamatuod sa mga panghitabo. Ginpaambit niya ang mga ebidensya nga ini sa mga tiglawas sang Makabayan, Liberal Party kag iban pa nga grupo.

Tungod sa pagpang-alang-alang ni Leviste nga isapubliko ang amo nga mga bidyo kag mensahe, wala nadala ang mga ini sa impeachment complaint nga ginpasaka batuk kay Marcos. Ginbasura na ang amo nga reklamo sadtong Pebrero 10, amo nga ginbuyagyag ni Tinio ang mga ebidensya nga natipon ni Leviste.