Bunga sang wala untat nga pagpakig-away sang pumuluyo sang Dupax del Norte, Nueva Vizcaya batuk sa pagpasilabot sang Woggle Corporation sa ila komunidad, napilitan ang Mines and Geosciences Bureau nga imando sadtong Pebrero 5 ang temporaryo nga suspensyon sang permit sa eksplorasyon sang kumpaniya. Ang siling rason sini amo ang “force majeure” ukon panghitabo nga wala sa kontrol sang may nagauyat sang permit.Lakip sa sining mga panghitabo ang pagtukod sang barikada, hugot nga pagpamatuk kag nagaluntad nga tensyon sa tunga sang mga residente kag kumpaniya.

Sa pihak sang mando, ginpadayon pa gihapon sang kumpaniya ang eksplorasyon. Sadtong Pebrero 17, sa bulig sang PNP, ginpaguwa sang kumpaniya ang mga makina sini kag gindul-ong sa DENR ang mga mineral sample nga nakuha halin sa baryo.

Sadtong Pebrero 12, nagprotesta ang ginatos ka residente, grupo pang-kapalibutan, tawong-simbahan kag mga nagasuporta sa away sang mga taga-Dupax. Ginpatigayon ang hublag sa kapitolyo sang Nueva Vizcaya agud ipanawagan ang gilayon nga kanselasyon sa permit sang eksplorasyon sang kumpaniya.

Ginlunsar ang hublag kadungan sang pagbista sang pito ka tigpangapin sa kapalibutan nga gin-aresto pagkatapos ang mapintas nga pagbungkag sa barikada sadtong Enero 23. Sa pagbista, bilang makatawo nga konsiderasyon, ginbawi sang RTC branch 30 ang mando sini nga ginapa-eksplikar ang pito ka residente sang Dupax del Norte kon ngaa indi sila dapat pasakaan sang kaso nga indirect contempt (paglapas sang mando sang korte).

Sadtong Pebrero 16 gintukod sang UP Diliman ang Defend Nueva Vizcaya Movement. Nagtambong diri ang mga lider sa komunidad sang Dupax del Norte, grupo nga pangkapalibutan, mga tumandok, tawong simbahan, akademiko nga institusyon, kag mga indibidwal agud pangapinan ang kapalibutan, dunang manggad kag kinamatarung sang pumuluyo sa Nueva Vizcaya.