Nagprotesta ang mga grupo sang mangunguma kag mamumugon sa uma sa atubang sang Department of Agriculture sa Quezon City bilang pagdumdom sa ika-7 ka tuig nga anibersaryo sang pagpasar sang layi para sa liberalisasyon sang importasyon sang bugas sadtong Pebrero 13.

Halin 2019 tubtob 2026, nagdako ang importasyon sang bugas halin 2.57 milyon tonelada padulong sa masobra sa 5 milyon tonelada. Nagresulta ini sa pagsarurot sang presyo sang humay, halin sa abereyds nga ₱20 kada kilo sadtong 2018 padulong sa ₱14-₱16 kada kilo sa masunod nga mga tinuig. Nagdulot ini sang pagkapierde sang mga mangunguma, pagbuhin ukon pag-untat sa pagtanum kag mas nga pagkalubong sa utang tungod sa gasto sa produksyon kag kawad-on sang nagakaigo nga suporta halin sa estado.

Sadtong Pebrero 10, nagprotesta sa Quezon City ang mga myembro sang Anakpawis Partylist bilang pagkundenar sa wala-pugong nga pagsaka sa presyo sang lana kag pakighimbon sang rehimen US-Marcos sa kartel sang lana.

Sadtong Pebrero 17 nagsaka ang presyo sang gasolina sang ₱1.20/litro kag ₱0.60/litro sa diesel kag kerosin. Sugod sang tuig, kabug-osan na nga nagsaka ang presyo sang gasolina sang ₱4.20/litro, diesel sang ₱7/litro kag ang kerosin sang ₱5/litro.

Samtang, nag-report ang Petron nga nagdako ang kita sini sang 37% ukon ₱9.7 bilyon sadtong Nobyembre 2025. Samtang nagaganansiya sang binilyon ang mga kumpaniya sang lana, sampaw-sampaw naman ang pagpaantus sa masang anakbalhas.